Soltústik Qazaqstanda mádenıet jáne óner qyzmetkerlerine qurmet kórsetildi
PETROPAVL. QazAqparat - Petropavldaǵy N.Pogodın atyndaǵy orys drama teatrynda mádenıet jáne óner qyzmetkerleri kúnine arnalǵan saltanatty shara ótkizildi, dep habarlaıdy «QazAqparat» HAA tilshisi.
Mádenıet salasy qyzmetkerlerin Soltústik Qazaqstan oblysy ákiminiń atynan ákimniń orynbasary Anarhan Dúısenova quttyqtady.
«Memleket basshysy atap aıtqan menshikti ulttyq kodymyzdy, tól mádenıetimizdi saqtap qalý qoǵamdyq sanany jańǵyrtýdyń alǵysharty. Ult kóshbasshysy maqalasyndaǵy baǵdarlamany mádenıet, muraǵat jáne qujattama salalarynyń qatysýynsyz júzege asyrý múmkin emes. Sizderdiń árqaısylaryńyzdyń kúndelikti eńbekterińiz qoǵamymyzdyń shyǵarmashylyq qabiletin damytýǵa, oblysymyzda baı mádenı orta qalyptastyrýǵa yqpal etedi», - dedi oblys ákiminiń orynbasary.
Búgingi tańda Soltústik Qazaqstan oblysynda 350 myńǵa jýyq eksponat bar 12 memlekettik mýzeı jumys isteıdi. Óńir muraǵattarynda bir jarym mıllıonǵa jýyq qujat saqtalǵan. Memlekettik kitaphanalardaǵy kitap qory 4 mıllıon dana kitap pen qujattardy qamtıdy. 
2,5 myńǵa jýyq soltústikqazaqstandyq kásibı merekelerin atap ótýde. Kópjyldyq shyǵarmashylyq eńbegi jáne Soltústik Qazaqstan oblysyndaǵy mádenıettiń damýyna qosqan úlesi úshin mádenıet salasynyń alty ókiline oblys ákiminiń qurmet gramotalary, tórt qyzmetkerge alǵys hattar tabystaldy. 
