Soltústik Qazaqstanda qyrkúıek aıynan beri 40 oqýshydan koronavırýs anyqtaldy
Sanıtarııalyq-epıdemıologııalyq departamenttiń baspasóz qyzmetiniń málimetinshe, 30 adamda COVID-19-dyń belgileri bar bolsa, qalǵan 12 turǵynda eshqandaı sımptom baıqalmaǵan. Infektsııaǵa shaldyqqandardyń kóbi, ıaǵnı 19 adam – Petropavlda, Qyzyljar jáne M.Jumabaev aýdandarynda segiz adamnan, Mamlıýt aýdanynda – bes, sondaı-aq Aqqaıyń aýdanynda 2 adam tirkelgen. Infektsııa juqtyrǵan 30 soltústikqazaqstandyqtyń PTR-taldaýyn epıdemıologııalyq kórsetkish boıynsha alǵan. Beseýi profılaktıkalyq maqsatta jáne jeteýi epıdemııalyq baqylaý kezinde anyqtaldy.
«Qyrkúıek bastalǵaly 40 oqýshynyń COVID-19 juqtyrǵany belgili boldy. Olardyń 22-i shtattyq rejımde bilim alsa, 18-i qashyqtan oqyp jatqan. Eki jaǵdaı mektepke deıingi bilim berý mekemelerinde tirkeldi. Balalar topqa kúndelikti baryp júrgen», - dep málim etti baspasóz qyzmeti.
Oblysta koronavırýstyń bar-joǵyn anyqtaý úshin test tapsyrýǵa bolatyn tórt zerthana jumys isteıdi. Naýryzdan beri aımaqta 137,5 myń taldaý alynǵan. Juqtyrǵandar sany jalpy test tapsyrǵandardyń 3,4%-y. Ótken táýlikte 667 PTR-taldaý alynǵan.
Jalpy oblysta 4730 adam koronavırýs dertine shaldyqty. Olardyń 2988-inde COVID-19 belgileri bolsa, 1742 adamda eshqandaı sımptom baıqalmaǵan. Infektsııa juqtyrǵandardyń 296-y nemese 6,2%-y – syrttan ákelingen.
9 qarashadan bastap Petropavl men Qyzyljar aýdanynda karantın tártibi engizildi.
Avtory: Olesıa Jýkoven