Soltústik Qazaqstanda KVI juqtyrǵandar bir aptanyń ishinde 36 paıyzǵa artty
PETROPAVL. QazAqparat – Soltústik Qazaqstan oblysynda koronavırýs ınfektsııasyn juqtyrǵandar sany artyp keledi, qaýipti vırýs ótken táýlikte 71 adamnan tabyldy, dep habarlaıdy QazAqparat tilshisi.
SQO-nyń bas memlekettik sanıtar dárigeri Áset Jumataev brıfıngte óńirdegi koronavırýsqa baılanysty epıdemıologııalyq jaǵdaıǵa toqtaldy.
18 qańtar kúni oblysta KVI juqtyrýdyń 71 jaǵdaıy tirkeldi. Bul ótken aptanyń uqsas kezeńimen salystyrǵanda 36,5% kóp, ıaǵnı 52-den 71-ge deıin ósken.
Koronavırýs juqtyrǵandardyń 50-i dárigerge aýyryp kóringen. Jalpy naýqastardyń basym bóligi – Petropavl turǵyndary, 31 adam aýyrǵan.
Al Reseımen shekaralas M.Jumabaev aýdanynda 10 adam KVI juqtyrsa, oblys ortalyǵynyń irgesindegi Qyzyljar aýdanynda 8 adamnan anyqtaldy.
Jambyl, Tımırıazev aýdandarynda – 7, Shal aqynda – 4, Esilde – 2, al Mamlıýt pen Aqqaıyń aýdandarynda 1 jaǵdaıdan tirkelgen.
Oblysta indet bastalǵaly 9633 adamnan koronavırýs anyqtaldy. Onyń ishinde 368 jaǵdaı nemese 4 %-i syrttan ákelingen. 5887 adamda ǵana aýrý belgileri bolǵan.
«Juqtyrǵandardyń basym bóligi - 61 %-i nemese 5845 jaǵdaıda medıtsınalyq kómekke júgingen adamdar arasynda tirkelgen. 23 %-inde nemese 2174 jaǵdaıda KVI baılanysta bolǵandar arasynda anyqtalsa, qalǵan 17 %-inde nemese 1614 jaǵdaıda vırýs syrqattarda profılaktıkalyq tekserý kezinde anyqtaldy», - deıdi Áset Jumataev.
