Soltústik Qazaqstanda qutqarýshylar dambanyń irgesin bekitip jatyr
PETROPAVL. QazAqparat - Soltústik Qazaqstan oblysyna QR ІІM TJ komıtetiniń qosymsha kúshi tartyldy, dep habarlaıdy «QazAqparat» HAA tilshisi óńirlik TJD-ǵa silteme jasap.
Astanadaǵy Ortalyq óńirlik mobıldi jedel-qutqarý jasaǵynyń ókilderi men Almatydaǵy Respýblıkalyq jedel-qutqarý jasaǵy sý tasqynyna qarsy is-sharalardy ótkizýge qatysty.
«Olar kúrdeli ahýalda Kojzavod kentindegi adamdardy qutqardy. Qutqarý jasaǵynyń qyzmetkerleri kenttegi qorǵanys dambasyn bekitý boıynsha ınjenerlik jumystardy júrgizdi. Dál sol kúni qutqarýshylardyń bir bóligi Esil ózeniniń tasýy saldarynan sý astynda qalǵan Qyzyljar aýdany Teplıchnoe jáne Prıbrejnoe aýyldaryna jetti», - dedi SQO TJD tótenshe jaǵdaılar saldarymen kúres bóliminiń bastyǵy Bolatjan Asqarbekov.
Qutqarýshylar Prıbrejnoe aýylynyń ózinde 166 adamdy, sonyń ishinde 23 balany evakýatsııalady.
«Biz QR Ulttyq gvardııasy 6637 áskerı bóliminiń jeke jasaǵymen, SQO TJ, jergilikti atqarýshy organdar qyzmetkerlerimen birlesip, qaýipti aımaqtarda táýlik boıy úzdiksiz kezekshilik uıymdastyrdyq jáne qorǵanys dambasyn nyǵaıtý boıynsha ınjenerlik jumystar júrgizdik», - dedi OÓMJQJ qutqarý tobynyń bastyǵy Elikbek Peıishbekov.
Qutqarý jasaǵynyń bastyǵy Vıktor Grıshaı habarlaǵandaı, Teplıchnoe aýylynda uzyndyǵy 1200 m, tereńdigi 2 metrlik sý ótkizý kanalynda ınjenerlik jumystar júrgizilip, uzyndyǵy 1200 m, bıiktigi 1,4 metrlik qorǵanys dýaly turǵyzyldy.
