Soltústik Qazaqstanda kúnine shamamen 5-6 myń adam vaktsına alyp jatyr
SQO densaýlyq saqtaý basqarmasy basshysynyń orynbasary Nurlan Aımanovtyń aıtýynsha, koronavırýsqa qatysty óńirdegi jaǵdaı kóńil kónshitpeıdi. 1 shildeden bastap aýrýhanalardaǵy ınfektsııalyq oryndar 630-ǵa jetti.
«Bir apta buryn 167 syrqat jatyp, 27 %-ǵa ǵana toldy, jansaqtaý bólimshesinde 17 aýyr naýqas em aldy. Qazir naýqastardyń sany 290-ǵa jetti, ınfektsııalyq oryndardyń 46 %-y tolǵan. Jaǵdaıy nashar syrqattardyń sany – 23. Alaıda bul san turaqsyz, kúnine orta eseppen 10 adam jansaqtaý bólimshesinen shyǵarylsa, sonshasy qaıta túsip jatady. Aýyryp jatqan 290 naýqastyń 80 %-ynan astamyna ottegi ballondary qajet. Tek bir aýrýhanany ǵana alatyn bolsaq olar táýligine 80 ottegi ballonyn qoldanady. Ótken jylmen salystyrsaq, bul óte kóp. Byltyr biz munsha ottegini 1 myń adamǵa paıdalanatynbyz. Bul neni kórsetedi? Búginde aýyryp túsip jatqan syrqattardyń basym bóligi – jastar. Olardyń ilespe aýrýlary joq. Taǵy bir ereksheligi – aýrý aǵzaǵa óte jyldam taraıdy. Buryn syrqattar 1-2 apta úıde ózdiginen emdelip, tek sosyn ǵana bolmaǵasyn aýrýhanaǵa túsetin. Al qazir keı jaǵdaıda aýyrǵandardy PTR test te kórsetpeıdi. Juqtyryp, aýyryp jatqandardyń kóbi – vaktsına almaǵandar. Sondaı-aq aýyrǵandarmen baılanysta bolǵandar. Qaraǵandy, Almaty, Nur-Sultan qalalarynan keıin jáne kórshi Reseıge baryp-kelip aýyrǵandar», - deıdi Nurlan Aımanov.
Dárigerdiń aıtýynsha, ambýlatorlyq syrqattardyń sany da artyp otyr. Oblysta jalpy 98 mobıldi brıgada bar. Maýsym aıynda óńir «jasyl» aımaqta bolǵanda nebary 10 mobıldi top qana jumys istegen. Qazir olardyń sany 56-ǵa jetti. Bir brıgada táýligine orta eseppen 8-20 shaqyrtýdy qabyldaıdy eken.
«Árıne, ótken jylmen salystyrǵanda koronavırýspen kúreske bizdiń daındyǵymyz bar. Ártúrli daıyn stsenarıı ázirlengen. Infektsııalyq oryn 60-70 %-ǵa tolǵan jaǵdaıda biz kezeń-kezeńmen ınfektsııalyq statsıonarlardy asha bastaımyz. 1860 oryndyq statsıonardy ashýǵa daıynbyz. Olar qazir bos turǵan joq. Bul aýrýhanalardaǵy júrek, ókpe, taǵy basqa aýrýlarǵa arnalǵan oryndar, biz qajet bolǵan jaǵdaıda olardy koronavırýsty juqtyrǵandardy emdeýge beremiz.
Medıtsınalyq qaýymdastyq 1,5 jyldan artyq qıyn jaǵdaıda jumys istep keledi. Biz koronavırýsqa qatysy joq syrqattarǵa tıisti deńgeıde kómek bere almaı otyrmyz. Koronavırýs ınfektsııasyn emdeıtin dári oılap tabylǵan joq. Qazir biz bul aýrýdyń tek saldaryn ǵana emdeımiz.
Syrqattanǵandar sany artqan jaǵdaıda ınfektsııalyq oryndardyń sanyn 600-ge kóbeıtemiz, qajet bolsa taǵy sonshaǵa arttyramyz. Al 2200-ge jetken jaǵdaıda oblystaǵy birde-bir aýrýhana, emhana jumys istemeı, tek qana KVI juqtyrǵandardy emdeıtin bolady», - deıdi densaýlyq saqtaý basqarmasy basshysynyń orynbasary.
Qazir oblysta 261 ókpeni jasandy jeldetý apparaty bar. Pandemııa bastalǵanda nebary 79 ǵana bolǵan.
«Oblysta qajetti qondyrǵylar jeterlik. Biraq ta biz basqa da syrqattardyń barlyǵyn, olarǵa da medıtsınalyq kómektiń qajettigin esten shyǵarmaýymyz qajet. Sol sebepti turǵyndardy jaǵdaıdy ýshyqtyrmaı vaktsına alýǵa jáne barlyǵymyzǵa belgili sanıtarlyq normalardy ustanýǵa shaqyramyn. Oblysta maýsym aıynyń sońynan bastap vaktsına alýshylar sany artty. Buǵan deıin kúnine orta eseppen 290 adamnan ǵana ekpe saldyryp kelse, qazir preparattyń birinshi komponentin 5-6 myń adam, ekinshi komponentin 1,5-2 myń adam alady. Osylaısha óńirde ekpe alǵandar sany 165 525 adamǵa jetti. Bul jospardyń 53,2 %-y. Oblys turǵyndarynyń 311 myńnan astamy alýy tıis. Bul barlyq eresek halyqtyń 76,5 %-y. Áli de 145 myńnan astam adam vaktsınatsııadan ótýi kerek», - deıdi Nurlan Aımanov.
Mamannyń aıtýynsha, óńirde vaktsınanyń eki túri bar, olar: Spýtnık V jáne QazVac. Qazaqstandyq preparat sanaýly ǵana bolsa, reseılik vaktsına jetkilikti deńgeıde, ár ekpe pýnktinde bar.
Buǵan deıin SQO-nyń «qyzyl» aımaqqa ótip, oblystyń bas memlekettik sanıtar dárigeriniń jańa qaýlysy shyqqanyn aıtqan edik.
