Soltústik Qazaqstanda kún jylynǵaly 142 adamdy kene shaqqan
SQO Taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, bıyl kene shaqqandardyń sany ótken jyldyń osy aralyǵymen salystyrǵanda 8 % az. Zııandy jándikten zardap shekkenderdiń ishinde kene entsefalıti tirkelgen joq.
Mamandardyń aıtýynsha, shaqqan kene adam ómirine qaýip tóndirmeıdi. Alaıda jándiktiń silekeıimen birge qanǵa túsetin vırýstar adamǵa kene entsefalıti aýrýyn juqtyrýy múmkin.
Kenelerdiń sanyn azaıtyp, taralýyna tosqaýyl qoıý úshin jyl saıyn óńirde profılaktıkalyq dezınsektsııalyq sharalar júrgiziledi. Bıyl bul maqsatqa 4 mln teńge bólindi. Jalpy bıyl 1 myń 51 ga jer óńdelýi qajet bolsa, onyń 420 gektarynda bul jumys atqaryldy.
«Óńdeýge masaǵa da, kenege de áser etetin preparatty tańdaýǵa usyndyq. Sol sebepti dárileý jumystary júrgizilgende sýy bar oıpań jerler de óńdeldi. Qarajat respýblıkalyq bıýdjetten bólindi. Nezizinen bul jumystar balalardyń jazǵy saýyqtyrý lagerlerinde, saıaqbaqtarda, adam kóp júretin oryndarda júrgiziledi», - deıdi SQO Taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Kúlpash Talasbaeva.
Sanıtar dárigerlerdiń aıtýynsha, kene adamdar úshin shilde aıyna deıin qaýipti. Keıin olardyń belsendiligi tómendeıdi. Sol sebepti tabıǵat aıasyna shyqqanda ashyq tústi, jabyq kıim, etik kıgen jón. Mindetti túrde bas kıim de kııý kerek. Kenege qarsy repellentterdi de qoldanýǵa bolady. Al kene shaqqan jaǵdaıda birden dárigerlerdiń kómegine júginý kerek.
«Aldyn alý sharalarynyń biri – kene taratatyn aýrýlarǵa qarsy ekpe jasatý. 3 kezeńnen turatyn egý jumystary júrgiziledi. Birinshi jáne ekinshi vaktsına arasy - 5-7 aı. Al ekinshi men úshinshi ekpeniń arasy - 12 aı», - deıdi Kúlpash Talasbaeva.