Soltústik Qazaqstanda Qulsary áýlıe qorymyna shıpa izdep keletinder kóbeıdi
PETROPAV. QazAqparat - Soltústik Qazaqstan oblysyndaǵy Qulsary batyr beıitiniń basyna adamdar shıpa izdep keledi, - dep habarlaıdy «QazAqparat» HAA tilshisi.
Esil aýdanynda Bulaq aýylynan jeti shaqyrym jerde Abylaı hannyń senimdi serikteriniń biri Qulsary batyrdyń zıraty jatyr. XVIII ǵasyrdan habar beretin qujattarda Qulsary batyr el birligi men yntymaǵy jolynda eńbek etken memleket qaıratkeri retinde eske alynady. Soltústik Qazaqstan oblysynyń entsıklopedııasynda Qulsary batyrdyń Abylaı hannyń Reseımen qarym-qatynas jasaýdaǵy senimdi ókili de bolǵandyǵy aıtylady. Onyń batyrlyǵy jaıynda tarıhı qujattarda málimetter saqtalmaǵan. Degenmen el aýzyndaǵy ańyz-áńgimelerge qaraǵanda Qazaq elin qorǵaý úshin on myń qol jınaǵan daryndy qolbasshy, qaharman batyr bolǵan.
Halyq ózi súıgen batyr qolbasshynyń qaharmandyǵy men danalyǵyna qaraı áýlıe atap ketken. Óıtkeni elge keler qaýipti kún burynnan boljaı biletin kóripkeldigi, syrqatyna shıpa izdep kelgenderdi emdep qaıtaratyn qasıetteri bolǵan.
1958 jyly onyń beıitine áýlıeniń altynshy urpaǵy Qalıasqar Raqymov qulpytas qoıyp, aınalasyn qorshaıdy. Sońǵy jyldary áýlıeniń basyna táý etip, elimizdiń túkpir-túkpirinen em izdep keletinder kóbeıe bastady. Qulsary batyr beıiti Tarıh jáne mádenıet eskertkishteriniń memlekettik tizimine engizilgen.
