Soltústik Qazaqstanda qonys aýdarýshylar úshin 3 myń úı salynady
PETROPAVL. QazAqparat - Soltústik Qazaqstan oblysynda qonys aýdarýshylar úshin úsh jyldyń ishinde úsh myń úı salynady, dep habarlaıdy «QazAqparat» tilshisi.
Memleket basshysynyń tapsyrmasymen ázirlengen SQO-ny áleýmettik-ekonomıkalyq damytýdyń 2018 - 2021 jyldarǵa arnalǵan keshendi jospary aıasynda baspanalar perspektıvalyq eldi mekenderde salynady. Kelesi jyly jergilikti bılik 629 jeke turǵyn úı salýǵa nıetti. Taǵy bir jyldan soń - 1 myń, al 2021 jyly 1,5 myń úı boı kótermek.
Oblystyq Qurylys basqarmasynyń basshysy Serik Muhamedıevtiń málimetinshe, bıylǵy jyly 100-ge jýyq úı salynǵan. Baspana usyný arqyly óńirge basqa oblystardan eńbek resýrstaryn tartý jumystary júrgizilýde. Arnaıy mehanızm da ázirlengen: kásipker úıdi óz qarajatyna salyp, mamandardy shaqyrady. Barlyq talaptar saqtalǵan jaǵdaıda úıler memlekettik bıýdjet qarajatyna satyp alynady. Osyndaı alǵashqy úıler Taıynsha aýdanynyń Ilıchevka aýylynda salyndy.
«Bıyl eńbek resýrstaryn tartý úshin jeke turǵyn úılerdiń qurylysyna kiristik. Aýyldarda úı sala bastadyq. Bekitilgen jobalarda barlyǵy, tipti, tóbe men irgetastyń bıiktigi eskerilgen», - dep atap ótken bolatyn keńesterdiń birinde oblys ákimi Qumar Aqsaqalov.
Azamattardy eńbekke jaramdy halqy kóp aımaqtardan Soltústik Qazaqstan oblysyna kóshirý arqyly kóshi-qonnyń teris saldosyn tómendetý shamalanyp otyr. 2021 jylǵa qaraı oń saldony 413 adamǵa jetkizý jospary bar.
