Soltústik Qazaqstanda kólden 500 kg óli balyq jınap alyndy

NUR-SULTAN. QazAqparat – Soltústik Qazaqstandaǵy Pıtnoe kólinen 500 keli óli balyq súzip alyndy, dep habarlaıdy QazAqparat tilshisi.

«2020 jyldyń 18 mamyrynda SQO memlekettik ınspektorlary óńirdegi Pıtnoe kólinde balyqtyń qyrylý faktisin tirkedi. Inspektsııa mamandary jergilikti atqarýshy organ qyzmetkerlerimen, «Balyq sharýashylyǵy NPTs» JShS mamandarymen birlesip, atalmysh kólge zertteý júrgizdi. 500 keli óli balyq (móńke balyq) jınap alyndy. Súzilip alynǵan balyqtyń bári joıyldy», - dep jazady Facebook paraqshasynda Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet.

Mamandar balyqtyń synamasyn alyp, laboratorııalyq zertteýge joldaǵan.

Balyqtyń neden qyrylǵany aldaǵy ýaqytta qosymsha habarlanady.