Soltústik Qazaqstanda qolaısyz aýa raıyna baılanysty jedel jeli iske qosyldy
PETROPAVL. QazAqparat – Soltústik Qazaqstan oblysynda ótken táýlikte boran soǵyp, oblystyq, respýblıkalyq mańyzy bar keı joldar jabyldy. Qar qursaýynda qalǵan 13 adamǵa kómek qajet boldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, boran, kóktaıǵaqtyń saldarynan «Jezqazǵan-Petropavl» tas jolynyń Aqmola oblysy men Novoıshımka eldi-mekenine deıingi aralyq, «Ekaterınbýrg-Almaty» tas jolynyń Qostanaı jáne Aqmola oblystarynyń shekarasyna deıin jáne «Kókshetaý-Rýzaevkanyń» Saýmalkól men Rýzaevka aralyǵy jabyldy. Qolaısyz aýa raıyna baılanysty joldardy jabý kólik júrgizýshilerdi kóptegen jaısyzdyqtan qutqarady. Alaıda keı kólik júrgizýshilerine jedel kómek kórsetýge týra kelgen.
Joldardy qar alyp qalýyna baılanysty Esil jáne Ǵ.Músirepov aýdandarynyń aýmaǵynda jergilikti atqarýshy organdar, JShS jáne qutqarýshylar 5 jeńil kólikti evakýatsııalady. Olarda 12 jolaýshy bolǵan, eshqaısysyna medıtsınalyq kómektiń qajeti bolmady.
Al 4 aqpan keshqurym Ǵ.Músirepov aýdanynda «Ekaterınbýrg-Almaty» jolynyń Toqsan bı aýylynyń mańynda MAN markali mashına jol shetine túsip ketken. SQO TJD mamandary, jergilikti atqarýshy organdar jáne DEÝ-66 kásipornynyń kómegimen júk kóligin shyǵaryp, ol jolyn jalǵady.
