Soltústik Qazaqstanda qatty daýyldan eki adam jaraqat aldy
PETROPAVL. QazAqparat – Soltústik Qazaqstan oblysynda qatty daýyl turyp, saldarynan birneshe aýdandaǵy ǵımarattarǵa zaqym keldi. Eki adam jaraqat aldy, dep habarlaıdy QazAqparat tilshisi.
SQO tótenshe jaǵdaılar departamenti osyǵan baılanysty brıfıng ótkizdi. Vedomstvo bastyǵy Ramıl Kamalovtyń aıtýynsha, 7 sáýir kúni 7 aýdanda 24 nysannyń shatyryn julyp ketti. Jalpy aýmaǵy - 8 myń sharshy metr.
«Aıyrtaý, Tımırıazev, Ǵ.Músirepov, Aqqaıyń, Taıynsha, Aqjar jáne M.Jumabaev aýdandarynda negizinen densaýlyq saqtaý, bilim berý mekemeleri men jeke turǵyn úıler daýyldan zardap shekti. ıAǵnı, 6 mekteptiń, 2 densaýlyq saqtaý, 1 dúkenniń, shaǵyn bıznes ókilderine tıesili 6 ákimshilik ǵımarattyń jáne 1 bıdaı óńdep, saqtaıtyn nysannyń shatyrlaryn julyp ketti», - deıdi Ramıl Kamalov.
Qatty daýyldan eki adam zardap shekti.
«8 sáýir Tımırıazev aýdanyndaǵy Komsomolskoe eldi mekeninde ekpini sekýndyna 30 metrge jetetin jáne odan da joǵary qatty jeldiń saldaryna túngi saǵat 2.00 shamasynda dúkenniń shatyryn julyp ketken. Saldarynan eki adam jaraqat aldy. Olar - 1989 jáne 1977 jyly týǵan azamattar. Olar qazir statsıonarda em alyp jatyr, jaǵdaıy birqalypty», - deıdi departament basshysy.
Jergilikti atqarýshy organdarmen birge kelgen shyǵyn mólsherin anyqtaý maqsatynda arnaıy komıssııa quryldy. Ǵımarattar tez arada jónge keltiriletin bolady. Birinshi kezekte aýrýhanalar men mektepter jóndeledi.
Ramıl Kamalovtyń aıtýynsha, zaqym kelgen ǵımarattardyń arasynda M.Jumabaev aýdanyndaǵy úsh qabatty aýrýhana da bar. Nysannyń shatyryn julyp ketken. Jalpy aýmaǵy - 600 sharshy metr. Aýrýhanada bosanatyn úsh áıel jatqan, olar zardap shekken joq.
