Soltústik Qazaqstanda qarjy pıramıdasynyń qyzmeti tekserilýde
PETROPAVL. QazAqparat - SQO ІІD tergeý basqarmasy qarjy pıramıdasyn qurý jáne basqarý faktisi boıynsha sotqa deıingi tergeý jumystaryn bastady, dep habarlaıdy «QazAqparat» HAA tilshisi polıtsııa vedomstvosynyń baspasóz qyzmetine silteme jasap.
Qylmystyq is aıasynda uıymdasqan qylmysqa qarsy kúres basqarmasynyń qyzmetkerleri men ІІD tergeýshileri Petropavlda osy jyldyń qańtar aıynan bastap jumys istep kele jatqan kompanııanyń qyzmeti týraly barlyq mán-jaıdy anyqtaıdy.
«Kompanııa klıentterge aıyna salynǵan somanyń 17-den 26 protsentine deıin tabys qarastyratyn birneshe paket usynǵan. Óz kezeginde, salymshylar qarjylaryn salýǵa daıyn basqa da qatysýshylardy alyp kelýge mindettelgen. Olardyń artynan tirkelgen adamdar sanyna baılanysty qosymsha bonýstar berilip otyrǵan», - dedi SQO ІІD baspasóz qyzmeti.
Kelisimshartqa sáıkes, kompanııa salynǵan qarjyny salymshylarǵa kez kelgen ýaqytta berýi tıis bolǵan. Alaıda, soltústikqazaqstandyqtar aqshalaryn osy kúnge deıin ala almaı júr.
«Kompanııa óz qyzmetiniń zańdy ekendigin skanerlengen qujattarmen dáleldedi. Kásipkerlik qyzmetke qoldanylmaıtyn jeke tulǵalardan qarjy alý, zattaı qyzmettiń bolmaýy jáne sońynan adamdardy ertip paıda tabý - qarjy pıramıdasynyń belgileri. Munyń bárin jiti tekserý kerek», - dep atap ótti SQO ІІD uıymdasqan qylmysqa qarsy kúres basqarmasynyń bastyǵy, polıtsııa podpolkovnıgi Álıhan Baıqadamov.
Kompanııaǵa 50 azamattyń qarjy salǵany anyqtaldy. Polıtsııa onyń tolyq tizim emestigin alǵa tartyp, barlyq salymshylardyń baılanysqa shyǵýyn suraıdy.
