Soltústik Qazaqstanda karantın kezinde ajyrasý kúrt azaıǵan
PETROPAVL. QazAqparat – Soltústik Qazaqstan oblysynda tótenshe jaǵdaı kezinde ajyrasý kúrt azaıyp, sheteldikke kúıeýge shyqqandar sany artqan, dep habarlaıdy QazAqparat tilshisi.
SQO ádilet departamentiniń málimetinshe, óńirde jyl basynan 808 jup nekesin zańdastyrǵan. Onyń 75-inde soltústikqazaqstandyqtar sheteldiktermen shańyraq kóterdi.
«Byltyr osy aralyqta 1 myń 29 neke qıyldy. Onyń qyryǵy sheteldikpen nekege otyrdy. Bıyl jalpy nekege otyrýshylardyń azaıýyna karantın shekteýleri sebep bolýy múmkin. Sondaı-aq byltyr 677 jup nekesin buzsa, bıyl jyl basynan 15 mamyrǵa deıin 384 otbasy ajyrasýǵa ótinish berdi», - deıdi SQO ádilet departamentiniń bólim jetekshisi Tatıana Gorıcheva.
Al 1 sáýir men 15 mamyr aralyǵynda 130 jup nekesin zańdastyrý úshin onlaın ótinish bergen. Osy ýaqytta 22 otbasy ajyrasyp ketti. 2019 jyly osy aralyqta 243 shańyraq buzylǵan.
Petropavl qalasynyń Azamattyq hal aktilerin tirkeý bólimi tótenshe jaǵdaı kezinde 600-den astam elektrondy ótinish qabyldaǵan.
Bólim jetekshisi Baıan Ahmetovanyń aıtýynsha, mamandar balanyń týýyn, neke qııý, ajyrasý, qaıtys bolýdy onlaın tirkep otyrdy. Osy aralyqta 188 jup nekesin tirkese, 31-i neke qııýǵa ótinish bergen. Sondaı-aq ómirge kelgen 295 sábı tirkeldi. Endi turǵyndar sanıtarlyq normalardy saqtaı otyryp, daıyn qujattardy kelip ákete alady.
