Soltústik Qazaqstanda qar qursaýynda qalǵan 500-den astam jolaýshy evakýatsııalandy
PETROPAVL. QazAqparat - Jeksenbi kúni qar qursaýynda qalǵan 500-den astam adam qutqaryldy, dep habarlaıdy «QazAqparat» HAA tilshisi SQO TJD baspasóz qyzmetine silteme jasap.
Qatty jel men burqasyn Aıyrtaý, Temirıazev, Jambyl, Esil, Aqqaıyń, Taıynshy jáne Shal aqyn aýdandaryndaǵy respýblıkalyq, oblystyq jáne jergilikti mańyzy bar tasjoldardaǵy kólik qozǵalystaryna kedergi keltirdi.
Bir táýlik ishinde departamenttiń kezekshi dıspetcherlik qyzmeti basqarmasyna qar qursaýynda qalǵan azamattar týraly 1800-den astam telefon qońyraýy men habarlama kelip túsken. Qar qursaýy týraly 32 jaǵdaı tirkelip, 578 adam, sonyń ishinde 93 bala jáne 196 tehnıka qutqaryldy.
Apattyq-qutqarý jumystaryn júrgizý barysynda 23 ınjenerlik tehnıka men jeke quramnyń 45 adamy kómek kórsetti. Qaza tapqandar men zardap shegýshiler bolmady.
Qutqarýshylar atap ótkendeı, SQO turǵyndary tabıǵı apat týraly aldyn ala BAQ jáne SMS habarlamasy arqyly qulaǵdar etilgen. Oblys aýmaǵynda jeksenbi kúni keshke jáne búgin barlyq baǵyttaǵy avtokólikter úshin jol qozǵalysyna shekteý qoıyldy.
