Soltústik Qazaqstanda esirtki saýdalap kelgen saıt jabyldy
SQO prokýratýrasy baspasóz qyzmetiniń habarlaýynsha, monıtorıng barysynda prokýrorlar respýblıka aýmaǵynda esh kedergisiz jumys istep kelgen Big24.cc atty saıtty anyqtaǵan. Saıtqa kirýshilerge «spaıs», «amfetamın», «gash», «mefedron» sııaqty esirtkiniń kóptegen túrlerin satyp alý usynylady. «Bitcoin», «Litecoin», «Payeer» nemese «Qiwi» ınternet-ámııany arqyly esep aıyrysqannan keıin satyp alýshyǵa esirtkiniń qaıda tyǵylǵany aıtylady.
Al, bul saıtty jarnamalaǵan siltemeler Petropavl qalasyndaǵy keı ǵımarattardyń qabyrǵalarynan tabyldy. Saıttyń jumysyn zańsyz dep taýyp, el aýmaǵyndaǵy qyzmetin toqtatý úshin jáne olardyń ónimderiniń taralýyna jol bermeý úshin oblystyq prokýratýra Petropavl qalalyq sotyna aryzdandy. Aqpannyń 7-si kúni olardyń aryzy tolyǵymen qanaǵattandyryldy.
Oblys prokýrorlary osy sııaqty zańsyz saıttardy anyqtaý maqsatynda jumystaryn jalǵastyrmaq. Quqyq qorǵaý organdary jaýaptylardy anyqtap, olardy tıisinshe jazalaýǵa múddeli.