Soltústik Qazaqstanda Esildiń deńgeıi rekordtyq kórsetkishke jetti
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov sý tasqyny ahýalyna qatysty kún saıynǵy brıfıngte Esil ózenindegi sý deńgeıiniń rekordtyq kórsetkishke jetkenin málim etti, dep habarlaıdy «QazAqparat» HAA menshikti tilshisi.
«Tańǵy saǵat 8-de Sergeevka sý qoımasyndaǵy sýdyń deńgeıi 59 santımetrge tómendedi. Pokrovka aýylyndaǵy Esil ózeniniń deńgeıi 14 metrden asty. Kópjyldyq baqylaýdyń tarıhynda mundaı jaǵdaı alǵash ret baıqalyp otyr. Sýdyń eń joǵary deńgeıi 189 santımetrge tómen bolǵan. Búgin sý tasqyny órshı túsetini kútilýde. Ózenniń Petropavl aýmaǵyndaǵy tusyna qyzyl sý 23-24 sáýir kúnderi keledi. Sý tasqyny 29 sáýirge deıin jalǵasýy yqtımal», - dep atap ótti óńir basshysy.
Oblys ákimi sonymen qatar, Sergeevka sý qoımasyndaǵy qaraý alańynyń jartylaı qıraýyna qatysty túsinik berdi. Qumar Aqsaqalov atap ótkendeı, bul jaǵdaı sý torabynyń qurylymyna esh áser etpeıdi jáne qaýip tóndirmeıdi.
Zarechnyı kentinde evakýatsııalyq beket retinde úsh mektep daıyn tur. Halyqty qaýipsiz jerge kóshirý úshin qosymsha Ulttyq ulannyń kúshteri, Áskerı ınstıtýt kýrsanttary tartylýda. Zeınetkerler, júkti áıelder, múmkindigi shekteýli jandar men bir jasqa deıingi balalar jiti baqylaýǵa alynyp otyr.
«Sorǵy stansysynyń bógetin bekitý jumystary júrgizilýde. Sý ótpes úshin ony eki metrge deıin kóterip jatyrmyz. Sorǵy stansasyn sý basty dep jalǵan aqparat taratqandardy taptyq. Qazir qylmystyq tergeý júrgizilýde», - dep málimdedi SQO ákimi.
Sondaı-aq, ol Rýzaevkada úılerdi tekserý komıssııasy óz jumysyn aıaqtaǵanyn habarlady. Qazir tehnıkalardy baǵalaý jónindegi komıssııa jumys jasaýda. Esepshotqa 5 mln teńge jınaldy, qarajat áli de túsý ústinde. Erteń aýylda 200 adam qalpyna keltirý jumystarymen aınalysady. Sonymen qatar, SQO ákimi senbilikke ózi de qatysatyndyǵyn aıtty.
