Soltústik Qazaqstanda Esil sýynyń deńgeıi qaıta kóterildi
PETROPAVL. QazAqparat - Soltústik Qazaqstanda Esil ózenindegi sýdyń deńgeıi qaıta kóterildi, dep habarlaıdy «QazAqparat» HAA tilshisi.
«Sergeevska sý qoımasynda ekinshi tolqynnan keıin sýdyń deńgeıi 25 sm-ge tómendep, 222 sm-ni qurady. Esil aýdany Pokrovka aýylynda sýdyń qaıta kóterilýi baıqalýda. Qazir qyzyl sý Qyzyljar aýdanynyń Novonıkolsk aýyly mańynda. Petropavlda sý bir táýlikte 4 sm-ge kóterildi. Onyń deńgeıi taǵy úsh kún kóteriletini kútilýde. 5 mamyrdan keıin ol Petropavl sý qoımasy aýmaǵynda toqtaýy tıis jáne biz ekinshi maksımýmdy baıqaıtyn bolamyz. Qazgıdromettiń aqparatyna sáıkes, sý deńgeıi tómendeıtin bolady. Bizdiń oblystaǵy Toqsan bı gıdrobeketinde jáne Aqmola oblysyndaǵy Tasty karerde sýdyń deńgeıi 70 sm-ge tómendegeni tirkeldi», - dedi oblys ákiminiń orynbasary Anton Fedıaev.
Petropavl qalasynyń Zarechnyı kentinde qıyn ahýal qalyptasyp otyr. Mundaǵy sýdyń deńgeıi tym joǵary, aǵysy qatty. Kent qaladan aral sekildi bólinip qaldy. Tótenshe jaǵdaılarda tek qaıyqpen júrip-turý múmkin bolady. Osyndaı jaǵdaı Kojzavod kenti men Teplıchnoe aýylynda da oryn alyp otyr. Sý deńgeıiniń kóterilýi Dolmatovo, Sokolovka aýyldarynda baıqalýda. Prıbrejnoe kentimen baılanys júzý qurylǵylarynyń kómegimen ǵana júzege asyrylýda.
Anton Fedıaevtiń aıtýynsha, Ǵ.Músirepov atyndaǵy aýdanda tasqyn sý tolyǵymen ketip, komıssııa óz jumysyn aıaqtady jáne materıaldyq zalal esepteldi. «Qıraǵan úıler boıynsha zalaldyń quny 52 mln teńgeni qurap otyr. Jergilikti atqarýshy organdar úıleri qalpyna keltirýge jaramsyz otbasylarǵa satyp alatyn baspana izdestirýde. Tólenetin qarajat somasy ártúrli. Eń tómeni - 50 myń teńge», - dep málimdedi Anton Fedıaev.
Al, saıajaı ıelerine tabıǵı apattyń zalaly tólenbeıdi. Oblys boıynsha barlyǵy 221 úı sý astynda qalyp otyr.
