Soltústik Qazaqstanda elik atqan brakonerler ustaldy
PETROPAVL. QazAqparat – Soltústik Qazaqstan oblysynda jyl bastalǵaly zańsyz ańshylyqtyń ekinshi deregi tirkeldi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń habarlaýynsha, Maǵjan Jumabaev aýdanyna reıd barysynda tártip saqshylary men qoryqshylar brakonerlerdiń ústinen túsken. Olar Oktıabrskoe aýylynyń mańyndaǵy jolda VAZ 21310 avtokóligin, onyń artqy biliginen qara daqty baıqaǵan. Forma kıgen adamdardy kórgen júrgizýshiniń jyldamdyqty arttyrýy kúdikti kúsheıte tústi. Tártip saqshylary júrgizýshini qýyp jetip, kóligin jol shetine yǵystyrdy.
Kólikte aýdan ortalyǵy - Býlaevo qalasynyń 28, 27 jáne 25 jastaǵy úsh turǵyny bolǵan. Artqy oryndyqtan qarý men oq-dári bar oqshantaı, al júksalǵyshtan 2 sibir eliginiń múshelengen eti tabyldy. Keıinirek polıtseıler janýarlardy zańsyz atyp alǵan oryndy da izdep tapty.
Avtokólik, múshelengen et, qarý men oq-dári tárkilendi. Qajetti saraptamalar taǵaıyndaldy.
«Bul - bıyl tirkelgen zańsyz ań aýlaýdyń ekinshi faktisi. Reıd turaqty ótkiziledi. Tek dúısenbi 6 qańtardan bastap oblysta ań aýlaý tártibin buzǵany úshin – 26, balyq aýlaý boıynsha – 10 adam ákimshilik jaýapkershilikke tartyldy. Sondaı-aq, qarýdy zańsyz saqtaýdyń – 3, qarýdy saqtaý qaǵıdalaryn buzýdyń 1 deregi anyqtaldy», - dep habarlady SQO PD tabıǵatty qorǵaý polıtsııasy toby bastyǵynyń mindetin atqarýshy Ashat Qojabaev.
Prezıdent Qasym-Jomart Toqaev 2019 jyldyń 30 jeltoqsanynda «Qazaqstan Respýblıkasynyń keıbir zańnamalyq aktilerine qylmystyq, qylmystyq-protsestik zańnamany jetildirý jáne jeke adam quqyqtarynyń qorǵalýyn kúsheıtý máseleleri boıynsha ózgerister men tolyqtyrýlar engizý týraly» zańǵa qol qoıdy. Bul qujatta zańsyz ań aýlaýshylardyń jaýapkershiligin kúsheıtý jaıy da aıtylady.
