Soltústik Qazaqstanda egis naýqany bastaldy
PETROPAVL. QazAqparat - Búgin Soltústik Qazaqstan oblysynda egis naýqany bastaldy, dep habarlaıdy QazAqparat tilshisi.
Oblys ákiminiń birinshi orynbasary Aıdarbek Saparov QazAqparatqa málim etkendeı, soltústikqazaqstandyq sharýalar barlyq belgilengen aýdanda jerdi tyrmalap bolyp (ylǵal jabý), aýylsharýashylyq daqyldaryn sebýge kóshken.
"Búginde kóktemgi egis 111,5 myń gektardy nemese jospardyń 2,9% quraıdy. Onyń ishinde, astyq - 77 myń, maıly daqyldar - 30,6 myń gektarǵa sebildi. Kartop 2,1 myń gektarǵa, al kókónis - 0,3 myń gektarǵa egilgen", - dep bólisti A.Saparov.
Onyń aıtýynsha, oblystyń agroqurylymdary tuqymdarmen tolyqtaı qamtylǵan. Aýylsharýashylyq ónimderin óndirýshiler otandyq zaýyttardan 123,5 myń tonna mıneraldy tyńaıtqyshtardy alý úshin sharttar jasasqan. Onyń jartysy tólengen jáne 50 myń tonnasy tıelgen.
"Kóktemgi dalalyq jumystardy oryndaý úshin oblystyń aýylsharýashylyq ónimderin óndirýshilerge 1 lıtri 155 teńgeni quraıtyn 66,6 myń tonna dızel otyny bólingen. Bul jetkilikti mólsher dep esepteımiz. Sonymen qatar, dızel otynynyń 88% tólengen. Ony jetkizý jumystary mamyr aıynyń sońyna deıin aıaqtalady", - dedi A.Saparov.
Osy jyly Soltústik Qazaqstan oblysyndaǵy egistik alqap 4,1 mıllıon gektardy quraıdy. Astyqqa 2,7 mıllıon gektar jer bólinip otyr.
"Egistik alqabyn ártaraptandyrý aıasynda maıly daqyldar 1 mıllıon gektar jerge egiledi, bul kórsetkish aldyńǵy jylmen salystyrǵanda 41% joǵary", - dep atap ótti A.Saparov.
