Soltústik Qazaqstanda egin túsimi bıyl bitik bolady dep kútilýde
ASTANA. QazAqparat - Soltústik Qazaqstan oblysy bıyl egin jııý kórsetkishteri boıynsha tańǵaldyrýy múmkin. Ázirge kúzdik daqyldar jınalyp jatyr. Bul sharýanyń jartysy tyndyryldy. Suly men arpa da orylýda.
Endigi kezekte bıdaı tur. Onyń ónimdiligine degen boljam jaman emes. Oǵan aýa raıy kómektesip otyr. Muny soltústik óńirge barǵan QR aýyl sharýashylyǵy vıtse-mınıstri Qaırat Aıtýǵanov ta qýattady. Onyń sózine qaraǵanda, egin jınaý naýqanyna jasalǵan boljamdar jaqsy.
Oblystaǵy aýyl sharýashylyǵy qurylymdarynyń mashına-traktor parkin jańǵyrtý maqsatynda jyl basynan 6,5 mıllıard teńgege 615 zamanaýı tehnıka satyp alyndy. Sonyń ishinde «QazAgroQarjy» AQ arqyly lızıng talaptary boıynsha 5 mıllıard teńgege 250 birlik tehnıka satyp alyndy. Sonymen qatar, aǵymdaǵy jyldyń jıyn-terin naýqanyna 7700 kombaın tartylady, onyń árbir úshinshisi joǵary ónimdi.
Dızel otyny baǵasynyń ósýi boljamyna qaramastan, aýyl sharýashylyǵy taýaryn óndirýshiler burynǵydaı ony jeńildikpen satyp alatyn bolady. Bıyl Qzaqsıtanǵa egin oraǵy naýqanyn júrgizý úshin 392 myń tonna dızel otyny, al 1 tamyzda janar-jaǵarmaıǵa degen suranysty tolyq jabý úshin rezervten qosymsha 61 myń tonna bólindi.
Soltústik Qazaqstan oblysynda syıymdylyǵy 3,6 mıllıon tonnany quraıtyn lıtsenzııasy bar 52 astyq qabyldaıtyn kásiporyn jańa eginniń astyǵyn qabyldaýǵa daıyn. Jyl basynan Ýálıhanov aýdanynda syıymdylyǵy 27 myń tonnany quraıtyn «Severnaıa Nıva» JShS dán saqtaý qoımasy ashyldy. Taǵy 3 astyq qabyldaý beketi ashylady. Ozyq qondyrǵylarmen jaraqtandyrylǵan qoıma syıymdylyǵy 49 myń tonna.
2015 jyly Soltústik Qazaqstan oblysy bastyrylǵan astyq kórsetkishi boıynsha elde birinshi orynǵa ıe boldy.
