Soltústik Qazaqstanda egin oraǵy kezinde jasalǵan 32 urlyq ashyldy
PETROPAVL. QazAqparat – Soltústik Qazaqstan oblysy polıtsııa departamenti 52 kúnge sozylǵan «Astyq 2020» jedel-profılaktıkalyq is-sharasyn qorytyndylady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, «Astyq 2020» operatsııasy 20 tamyz ben 10 qazan aralyǵynda ótti. 13 aýdannyń árqaısynda krımınaldyq polıtsııa, ýchaskelik polıtsııa ınspektorlary, patrýl polıtseıleri, kınologtardan turatyn mobıldi top jumys istedi.
Urlyqtyń aldyn alýmen qatar tártip saqshylary sharýalar men astyq naýqanyna tartylǵandarǵa barynsha kómek kórsetýge tyrysty.
SQO polıtsıa departamenti bastyǵynyń orynbasary Rýslan Nazarovtyń aıtýynsha, mobıldi toptyń qyzmetkerleri daladaǵy joldardy, túnde jaryqsyz júrgen tehnıkany tekserdi.
«Astyq 2020» oblystyq jedel-profılaktıkalyq is-sharasy barysynda óńirde 35 qylmys tirkeldi. Onyń 21-i - astyq urlaý, jeteýi - janar-jaǵarmaı urlaý, 4 fakti aýyl sharýashylyq tehnıkasynyń qosalqy bólshekterin jáne 3 derek gerbıtsıd urlaýǵa qatysty.
35 qylmystyń 32-si «izi sýymaı» ashylǵan. Kóbine urlyqty astyq naýqanyna jumyldyrylǵan kásiporyndar men sharýshylyqtardyń óz jumysshylary jasaǵan.
