Soltústik Qazaqstanda demalys kúnderindegi «lokdaýn» alynady – ákim
«Sizder jańalyq qaraǵanda aımaqtaǵy jaǵdaı kúrdeli degen pikir qalyptasýy múmkin. Іs júzinde olaı emes. Jaǵdaı tolyq baqylaýda. Aımaqta qatań shekteý sharalary bir aıdan beri qoldanylyp keledi. Shekara beketterinde karantın statsıonarlary ornalastyryldy. PTsR-test bolmasa, elge kirýge tyıym salynǵan», - dep atap ótti ákim Ortalyq kommýnıkatsııalar qyzmetinde ótken brıfıngte.
Oblys ortalyǵynda karantın engizildi. Demalys kúnderi «lokdaýn» rejımi ornaǵan. Poıyzdardyń sany qysqaryp, óńirdegi avtobýs marshrýttary toqtatyldy.
«Bul sharalardyń barlyǵy jaǵdaıdy turaqtandyrý úshin qabyldanǵan. Kún saıyn vırýs juqtyrý men aýrýhanaǵa jatý oqıǵalary azaıyp keledi. Jalpy aýyrǵandardyń 94% jazylyp shyqty. Densaýlyq saqtaý júıesine de aıtarlyqtaı júkteme túsken joq. Statsıonardaǵy tósek-oryn qorynyń 36%-da naýqastar jatyr. Josparly aýrýhanaǵa jatqyzý jumystary toqtaǵan joq. Sondyqtan, qazirgi epıdemııalyq jaǵdaıǵa súıene otyryp, jeltoqsan aıynyń ortasyna qaraı demalys jáne mereke kúnderindegi lokdaýndy alýdy, oblys ortalyǵynda shekteý sharalaryn aıtarlyqtaı jeńildetýdi josparlap otyrmyz», - dedi Q. Aqsaqalov.
Sonymen birge, aımaqta jańa juqpaly aýrýlar aýrýhanasy salynyp, jasandy tynys alý apparattary satyp alyndy. Jedel járdem kólikterin jabdyqtaý 76 paıyzdan 100 paıyzǵa jetkizilgen.