Soltústik Qazaqstanda daýyl turyp, burshaq jaýady
NUR-SULTAN. QazAqparat - Soltústik Qazaqstan oblysynda aýa raıyna baılanysty eskertý jarııalandy, dep habarlaıdy QazAqparat Qazgıdrometke silteme jasap.
18-19 maýsym kúnderi Soltústik Qazaqstan oblysynyń keı jerlerine tuman túsip, naızaǵaı oınaıdy, kúndiz daýyl turyp, burshaq jaýýy múmkin. Jel soltústik-batystan 15-20 m/s jyldamdyqpen soǵady.
«Qazaqstannyń shyǵysyna Batys Sibirdiń soltústik aýdandarynan kelgen salqyn aýa aǵyndary jyljyp keledi. Sondyqtan aldaǵy úsh kúnde atalǵan óńirlerde oqtyn-oqtyn jańbyr sebelep, naızaǵaı jarqyldaıdy, burshaq jaýýy múmkin, ekpindete jel soǵyp, aýa temperatýrasy klımattyq normadan tómenirek bolady», - delingen habarlamada.
Al ońtústikte jáne batys oblystarda aptap ystyq bolady. Sınoptıkterdiń aıtýynsha, Qazaqstannyń ońtústigi men batysynda joǵary atmosfera qysymy turaqtalýyna baılanysty, kún ashyq ári ystyq bolady.
