Soltústik Qazaqstanda dárigerler jas bosanǵan áıelge jol boıynda ota jasady
PETROPAVL. QazAqparat – Soltústik Qazaqstan oblysynda dárigerlerdiń kóligi synyp jolda qalyp, olar áıelge qajetti otany qutqarýshylardyń kóliginde jasady, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, Músirepov aýdany Novoıshımka eldimekenindegi № 16 órt sóndirý bólimshesine tańǵy saǵat 8.30 shamasynda kómek suraǵan habarlama túsedi.
Muqyr eldimekeninde múmkindigi shekteýli 21 jastaǵy áıel bosanǵan. Ony sábıimen aýdandyq aýrýhanaǵa jetkizýi tıis jedel járdem kóligi jolda qaıtyp kele jatqanda synyp qalǵan.
Novoselovka-Muqyr eldimekenderiniń arasynda jolda qalǵandarǵa jedel top attandy.
Oqıǵa ornyna tez jetý úshin qutqarýshylar jol tańdamaıtyn «TREKOL» kóligine minip, jarty saǵattyń ishinde sonda boldy.
«Aýdandyq ortalyq aýrýhananyń dárigerleri Vıktor Avramenko men Veronıka Kazına 21 jastaǵy kelinshekti bosandyryp alǵan. Alaıda onyń jaǵdaıy kúrt nasharlap, ota jasaý qajet boldy. Anasy men jańa týǵan sábıdi abaılap jyly kólikke mingizdik. Sol jerde dárigerler áıelge qajetti otany jasady», - deıdi órt sóndirý bóliminiń basshysy Nursultan Eleýsizov.
Al saǵat 11.00 shamasynda jas bosanǵan ana men onyń sábıi aman-esen aýdandyq ortalyq aýrýhanaǵa jetkizildi. Mamandardyń aıtýynsha, olardyń densaýlyǵyna keler qaýip joq.
