Soltústik Qazaqstanda byltyr jasyna tolmaǵan 74 sábı shetinegen
SQO densaýlyq saqtaý basqarmasynyń alqa otyrysynda oblystyq kópbeıindi balalar aýrýhanasy dırektorynyń orynbasary Nurlan Jaqypov 2020 jyly bir jasqa deıingi 56 bala qaıtys bolǵanyn habarlady.
Bes jasqa deıingi qaıtys bolǵan balalar sany - 87. Munda da 20 %-ǵa jýyq ósim bar.
«Qaıtys bolǵan balalardyń beseýi tynys alý júıesi, úsheýi – qan aınalym júıesi aýrýlarynan kóz jumdy. Týa bitken aýrýlardan bolatyn ólim eki ese ósken. Sonyń jartysy - júrek-qan tamyrlary júıesiniń týa bitken aqaýlary. Júkti áıelderdiń esepke kesh turýynan ishtegi baladaǵy aýrý da kesh anyqtalǵa. Taǵy 11 jaǵdaıda júrek aqaýy tek úshinshi skrınıngte anyqtaldy», - deıdi dáriger.
Byltyr úıdegi sábı óliminiń toǵyz jaǵdaıy tirkeldi. 2020 jyly bes derek anyqtalǵan. Nurlan Jaqypovtyń aıtýynsha, buǵan alǵashqy medıtsınalyq-sanıtarlyq kómek deńgeıinde jetkiliksiz jumys atqarylýy sebep. Mysal retinde ol JRVI-den bolǵan balalar ólimin keltirdi. Mundaı sábıler aýrýhanalarda emdelýi kerek.
«Máseleni sheshý úshin júkti áıelderdi oblystyq perınataldyq ortalyqqa der kezinde skrınıngke jiberý, patronaj ben oǵan baqylaýdy qamtamasyz etý, fertıldi jastaǵy áıelderdi saýyqtyrý, júktilikti josparlaý, baqylaý jáne erte esepke qoıý qajet. Pandemııaǵa deıin eki aıda bir ret aýdandardy aralaıtynbyz. Aýyldarda joq mamandardan brıgada jınap, balalardy tekseretinbiz. Bul jaqsy kómek boldy. Nátıjesinde aýyrǵan balalar anyqtalyp, esepke qoıylatyn. Mundaı balalardyń tizimi ortalyq aýdandyq aýrýhanalardyń bas dárigerlerine jáne aýdan ákimderine berildi. Bizde reanımatsııalyq keńes berý ortalyǵy jumys isteıdi. Eger bala aýdandyq aýrýhanaǵa aýyr halde tússe, onda táýliktiń kez kelgen ýaqytynda keńes bere alamyz. 99 % jaǵdaıda dárigerler brıgadasy jergilikti jerde kómek kórsetý úshin jolǵa shyǵady. Bul jumysty jalǵastyryp, sanavıatsııamen baılanysty qaldyrý qajet», - deıdi Nurlan Jaqypov.
