Soltústik Qazaqstanda byltyr 6 jasóspirim ózine qol jumsaǵan
PETROPAVL. QazAqparat – Soltústik Qazaqstan oblysynda «Nur Otan» partııasynyń fılıaly uıymdastyrǵan jıynda sýıtsıdtiń sebepteri men kıberbýllıngtiń saldary týraly aıtyldy, dep habarlaıdy QazAqparat tilshisi.
«Nur Otan» partııasy SQOF baspasóz qyzmetiniń málimetinshe, ınternettiń keńinen qoldanylýynan jańa problemalar týyndaǵan, sonyń ishinde áleýmettik jelilerde adamdy qorlaý da bar. Bul qubylys ásirese jasóspirimder arasynda keń taraǵan jáne ol kıberbýllıng dep atalady.
SQO polıtsııa departamentiniń arnaıy tergeý-jedel toby aımaqtaǵy kámeletke tolmaǵandar arasyndaǵy zańǵa qaıshy kontent pen kıberbýllıngti anyqtaý máselelerimen aınalysady.
PD bastyǵynyń orynbasary Rýslan Nazarovtyń aıtýynsha, qyzmetkerler kúndelikti Instagram, Twitter, VK, OK, TikTok, Facebook toptary men qoǵamdastyqtaryna monıtorıng júrgizedi.
Maqsat – balalardy olardyń quqyǵyna nuqsan keletin qol suǵýshylyqtan jáne olardyń densaýlyǵy men damýyna zardabyn tıgizetin aqparattan oqshaýlaý jáne qorǵaý.
«2020 jylǵa jáne osy jyldyń 6 aıyna júrgizilgen ınternet-saıttarǵa monıtorıng barysynda, zańǵa qaıshy, onyń ishinde pornografııalyq mazmundaǵy materıaldarǵa 1725 silteme anyqtaldy, olardy buǵattaý úshin «Kıber qadaǵalaý» júıesine jiberildi. Oqý oryndarynda polıtsııa qyzmetkerleri turaqty negizde ınternette qaýipsiz qarym-qatynas taqyrybynda semınarlar men dárister ótkizedi», - deıdi «Nur Otan» partııasynyń SQOF janyndaǵy otbasy, áıelder jáne balalardyń quqyqtaryn qorǵaý máseleleri jónindegi qoǵamdyq keńestiń otyrysynda Rýslan Nazarov.
Kóbinese jasóspirimder arasyndaǵy kıberbýllıngtiń saldary sýıtsıdpen aıaqtalady. Búgingi tańda bul taqyryp óte ózekti.
Statıstıkaǵa sáıkes, 2020 jyly SQO aýmaǵynda kámeletke tolmaǵandar arasynda 6 sýıtsıd jáne 14 ózine-ózi qol jumsaý áreketi tirkeldi.
Osy jyldyń 6 aıynda óńirde 1 sýıtsıd jáne 6 áreket tirkeldi.
