Soltústik Qazaqstanda bıyl sýǵa shomylýǵa arnalǵan 58 oryn bekitildi

PETROPAVL. QazAqparat – Soltústik Qazaqstan oblysynda 12 kól men Esil ózeninde sýǵa shomylýǵa 58 arnaıy oryn bekitildi, dep habarlaıdy QazAqparat tilshisi.

SQO tótenshe jaǵdaılar departamenti brıfıng ótkizip, óńirdegi jaǵdaıǵa toqtaldy. Vedomstvo ókilderiniń málimetinshe, óńirde 60-tan astam ózen, 2 myńnan astam kól, 100 shaqty qazanshuńqyr bar. Alaıda munyń barlyǵynda birdeı sýǵa shomylýǵa bolmaıdy.

Sońǵy 7 jylda arnaıy ázirlenbegen oryndarda 180-nen astam adam, sonyń ishinde 24 bala sýǵa ketti.

«Sońǵy 8 jyl boıy arnaıy sýǵa shomylýǵa bekitilgen oryndarda adam qazasy tirkelgen joq. SQO ákiminiń qaýlysyna sáıkes, óńirde halyqtyń demalyp, sýǵa shomylýyna arnalǵan 58 oryn bekitildi. Olar 12 kólde jáne Esil ózeninde ornalasqan», - deıdi SQO TJD basqarmasynyń bastyǵy Marat Muratov.

Budan basqa departament mamandary jalǵa alýshylardyń ótinishterine sáıkes halyq demalatyn sý aıdyndaryn teksermek.

Ótken demalys kúnderi qutqarýshylar sýǵa shomylatyn jáne balyq aýlaıtyn jerlerde 32 reıdtik is-shara ótkizgen.

Basty maqsat – oqys oqıǵalardyń aldyn alý, eskertý. Qaýipsizdikti saqtaýǵa shaqyrý.

Brıfıngte sondaı-aq jarty jyl buryn Chıstoe kólinde joǵalǵan balyqshy denesiniń tabylǵandyǵy da aıtyldy.

«Mamlıýt aýdany Pchelıno eldi mekeniniń mańyndaǵy Chıstoe kólinde 31 qazan 2020 jyly joǵalǵan er adamnyń denesin taptyq. Ol Petropavl turǵyny, 1963 jyly týǵan. Aldyn-ala boljam boıynsha, sýǵa ketti dep esepteldi. Іzdeý jumystary muz qatqanǵa deıin júrgizildi. Bıyl kóldiń muzy erigennen keıin izdeý jumystaryn qalpyna keltirdik. 6 mamyr kúni balyqshynyń denesin jaǵalaýdan 25-30 metr jerden taptyq. Ol qutqarý jıletinsiz bolǵan», - deıdi SQO TJD jedel-qutqarý otrıadynyń súńgýir-qutqarý bólimshesiniń jetekshi-súńgýiri Qaırat Samaev.

Esterińizge salaıyq, er adam 5-synypta oqıtyn nemeresimen balyq aýlaýǵa baryp, joǵalyp ketken edi.