Soltústik Qazaqstanda bıyl kene shaqqandar sany 3 ese artty
PETROPAVL. QazAqparat – Soltústik Qazaqstan oblysynda kún jylynǵaly 98 adamdy kene shaǵyp, olar dárigerdiń kómegine júginýge májbúr boldy, dep habarlaıdy QazAqparat tilshisi.
Petropavl turǵyny Vasılıı Myslovskıı birinshi qalalyq aýrýhanaǵa shamamen bir apta buryn aýyr jaǵdaıda túsken.
Er adamnyń birneshe kún dene qyzýy 40 gradýstan túspeı, denesi bórtip, álsiregennen tósek tartyp jatyp qalǵan.
«Aldymen bulshyq etterim aýyrdy, soǵyp alǵandaı. Keıin 2-3 kún boıy temperatýram 37 -37,5 gradýs boldy. Kúnnen-kúnge jaǵdaıym nasharlap, álsizdik, jótel paıda boldy. Qatty tońdyryp, denemde bórtpe paıda boldy. Ystyǵym 40 gradýsqa deıin kóterilip, túspeı qoıǵandyqtan aýrýhanaǵa barýǵa májbúr boldym. Sol jerde men kene shaqqanyn bildim, bir emes eki kene shaqqan eken. Qazir jaǵdaıym jaqsy, kúni-túni janymnan shyqpaı em jasaǵan dárigerlerge, medbıbilerge alǵysym sheksiz», - deıdi Vasılıı Myslovskıı.
SQO-da epıdemıologııalyq maýsym bastalǵaly Vasılıı sııaqty 98 adam dárigerlerdiń kómegine júgingen. Onyń 32-si – 14 jasqa deıingi bala.
«Bıyl kene shaǵý jaǵdaılary jıilegen. Byltyr osy kezeńmen salystyrǵanda tek 34 adamdy kene shaqsa, bıyl zardap shekkenderdiń sany 3 ese artyp otyr. Ázirge kene entsefalıti tirkelgen joq. Kene entsefalıti - qaýipti ınfektsııalyq aýrý. Ortalyq júıke júıesin zaqymdaıdy. Aýrýdyń saldarynan adam múgedek bolyp qalýy, tipti ólip ketýi de múmkin», - deıdi SQO sanıtarııalyq-epıdemıologııalyq baqylaý departamentiniń bas mamany Aınash Saǵandyqova.
Byltyr óńirde 408 adamdy kene shaqqan, 9 adamda kene entsefalıti anyqtaldy. Bir adam osy qaýipti ınfektsııadan qaıtys boldy.
«Byltyr, ókinishke oraı, Qyzyljar aýdanynyń 60 jastaǵy turǵyny qaıtys boldy. Áıel adamdy tamyz aıynda kene shaǵyp alǵan. Ol kisi bastapqyda mán bermeı júre berip, der kezinde dárigerge qaralmaǵan. Saldarynan qutqarý múmkin bolmady. Sondyqtan da kene shaqqan jaǵdaıda birden dárigerge qaralýǵa keńes beremin. Keneni ózdiginen julyp alýǵa bolmaıdy. Ormanǵa, tabıǵat aıasyna shyqqan jaǵdaıda uzyn jeńi bar ashyq tústi kıim kıip, arnaıy krem, gel qoldanǵan jón», - deıdi Aınash Saǵandyqova.
