Soltústik Qazaqstanda bir kúnde eki adam sýǵa ketti
PETROPAVL. QazAqparat - Soltústik Qazaqstan oblysynda bir kúnde eki adam sýǵa ketip, ólim qushty, dep habarlaıdy QazAqparat tilshisi.
Oblystyq Tótenshe jaǵdaılar departamentiniń málimetinshe, jeksenbi kúni Aıyrtaý aýdanynyń Imantaý kóline 30 jastaǵy er adam batyp ketken. Onyń denesin sýdan jergilikti turǵyndar alyp shyqty.
«Dál osy kúni Qyzyljar aýdanynyń «Qarǵa araly» demalys ornynyń mańaıynda 39 jastaǵy er adam Esil ózenine shomylyp júrip qaza tapty. Onyń máıitin jedel qutqarý jasaǵynyń qyzmetkerleri jaǵaǵa alyp shyqqan», - deıdi baspasóz qyzmetindegiler.
Jyl basynan beri oblystyń sý qoımalaryna 4 adam batyp ketken.
Qutqarýshylar turǵyndardy sýdaǵy qaýipsizdik sharalaryn saqtap, tek shomylýǵa arnalǵan jerlerde sýǵa túsýge shaqyrady. Sondaı-aq, mas kúıde shomylmaı, balalardy qaraýsyz qaldyrmaýǵa keńes beredi.
