Soltústik Qazaqstanda balyqshy kólge batyp ketti
PETROPAVL. QazAqparat - Soltústik Qazaqstan oblysynda er adam balyq aýlap júrip, sýǵa batyp ketti, dep habarlaıdy QazAqparat tilshisi.
TJD baspasóz qyzmetiniń málimetinshe, apat Mamlút aýdany Beloe aýylyndaǵy Jagrıno kólinde bolǵan. 50 jastaǵy er adam sý aıdynyna qutqarý quraldarynsyz kelgen. Qutqarýshylar onyń denesin kelesi kúni tapty.
Qutqarýshylardyń aıtýynsha, kúzde balyq aýlaýdy jaqsy kóretinder qaıyq pen tor qoldanady, biraq qutqarý jıletterin kııýdi umytyp ketedi.
«Olar qaıyqtyń aýdarylýy nemese onyń tesilýi saldarynan sýǵa qulap, sý túbine tartatyn kıimderin jyldam sheship úlgermeı qalady. Árbir balyqshy únemi abaı bolyp, qaýipsizdik sharalaryn saqtaýy tıis», - dep atap ótti jedel-qutqarý jasaǵy bastyǵynyń orynbasary Vıktor Derjanskıı.
Jyl basynan beri balyq aýlap júrip, sýdaǵy tótenshe jaǵdaı saldarynan 3 soltústikqazaqstandyq mert bolǵan.
