Soltústik Qazaqstanda aıyna 20 myń teńgege kún kórý usynylýda
PETROPAVL. QazAqparat - Soltústik Qazaqstan oblysynda aqpan aıynda jan basyna shaqqandaǵy eń tómengi kúnkóris deńgeıi 20 119 teńgeni qurady, dep habarlaıdy «QazAqparat» HAA tilshisi statıstıka departamentine silteme jasap.
Departamentten atap ótkendeı, eń tómengi kúnkóris deńgeıi ótken aımen salystyrǵanda 0,7 paıyzǵa, al 2016 jyldyń jeltoqsan aıyna qaraǵanda 2 paıyzǵa ósken.
«Onyń qurylymynda azyq-túlikke - 12 071 teńge, basqa da taýarlar men aqyly qyzmetterge 8 048 teńge jumsalatyny kórsetilgen. Sonyń ishinde, et pen balyq satyp alýǵa ketken shyǵyndar 21%, maı men jumyrtqaǵa - 16,4%, jemis-jıdekter men kókónisterge - 10,3%, un men astyq ónimderine - 9,4%, qant, sháı men dámdeýishterge 2,9% paıyzdy qurady», - delingen habarlamada.
0-den 13 jasqa deıingi balalardyń eń tómengi kúnkóris deńgeıi 16 168 teńgeni, 14-ten 17 jasqa deıingi jasóspirimderge - 25 415 (uldarǵa) jáne 19 472 (qyzdarǵa) teńgeni, 18 jastan asqan jumysqa qabiletti turǵyndarǵa - 23 959 (erler) jáne 19 023 (áıelder) teńgeni, zeınetkerler men qart kisilerge - 18 813 teńgeni quraıdy.
