Soltústik Qazaqstanda altyn óndirý birshama ulǵaıdy
PETROPAVL. QazAqparat - Jumys babymen Esil aýdanyna barǵan SQO ákimi Qumar Aqsaqalov «Áýlıe Gold Maınıng» seriktestiginiń altyn óndirý ken ornynda boldy, dep habarlaıdy óńir basshysynyń baspasóz qyzmeti.
Reseılik kompanııa altyn óndirýdi 2015 jylǵa qolǵa aldy. Osy kúnge deıin 100 myńnan tonnadan asa ken óndirildi. Alaıda tıisti kórsetkishterge qol jetkizilmegendikten ınvestor tehnologııany jańartý jumystaryn júrgizdi. Kompanııa basshylyǵy óndiristi 130 myńnan 600 myń tonnaǵa deıin ósirýdi josparlap otyr. Bul mejege 2018 jyly qol jetkiziledi dep kútilýde.
Óńir basshysy altyn óńdeıtin kásiporynnyń oblys ekonomıkasy úshin úlken mańyzǵa ıe ekenin atap ótti.
«Óndiris tolyq qýatyna shyqqan kezde óndiris protsesine 250 adam tartylady. Bıýdjetke 400 mıllıon teńgeden asa qarjy quıylmaq. Bul jobanyń áleýmettik mańyzy da bar. Jumysshylardy osy mańdaǵy eldi mekenderden alý qajet», - dep atap ótti Qumar Aqsaqalov.
Aıta ketý kerek, atalmysh joba ındýstrııalandyrý kartasyna engizilgen.
