Soltústik Qazaqstanda áleýmettik nan qymbattamaıdy

PETROPAVL. QazAqparat – Soltústik Qazaqstan oblysynda jergilikti bılik áleýmettik nandy qymbattatýǵa jol bermeıdi, dep habarlaıdy QazAqparat tilshisi.

Bul jaıynda óńir basshysy ákimdik otyrysynda málimdedi. Oblysta baǵany kelesi egin oraǵyna deıin ustaý úshin turaqtandyrý qoryna qajetti mólsherde un jınaldy.

«Bıyl aýa raıy eginshilikke qolaısyz boldy, onyń un baǵasyna áser etetinin aldyn ala bildik. Sol sebepti tamyz aıynda turaqtandyrý qoryna 3 myń tonna un jınadyq. Bul kólem kelesi jylǵa deıin jetedi. Osynyń arqasynda nannyń baǵasyn ósirmeı, bir deńgeıde ustap tura alamyz», - dedi Qumar Aqsaqalov.

SQO-da áleýmettik nandy jergilikti nan-toqash kombınaty pisiredi. Bólkeniń baǵasy - 61 teńge. Bul - ázirshe respýblıka boıynsha eń tómen baǵa. Óńirde sońǵy ret nan bıyl naýryz aıynda qymbattady. Ol joly kombınat pisiretin «osobyı» dep atalatyn nan birden 14 teńgege qymbattady. Turǵyndar arasynda suranysqa ıe ónim áleýmettik nanǵa qaraǵanda shamamen eki ese qymbat.

Oblys ákimi baspasóz qyzmetiniń málimetinshe, jergilikti bılik azyq-túlik baǵasyn baqylaýda ustap otyr. Baǵa óspes úshin turaqtandyrý qoryna kókónis, suıyq maı, jarmalar jáne basqa da áleýmettik mańyzy bar ónimder satyp alyndy. SQO Kásipkerlik jáne týrızm basqarmasynyń aqparyna qaraǵanda, búginde turaqtandyrý qorynda 385 tonna qant, 4,3 tonna qaraqumyq jarmasy, 448 qaptama qaraqumyq, 20 myń lıtr suıyq maı bar. 160 tonna sábiz jergilikti taýar óndirýshilerden kelisin 83 teńgeden satyp alynǵan.