Soltústik Qazaqstanda 85 eldimekenge kóktemgi sý tasqynynan qaýip bar

PETROPAVL. QazAqparat – Soltústik Qazaqstan oblysynda kóktemgi sý tasqynyna ázirlikti pysyqtaǵan oblystyq ákimdiktiń otyrysy ótti, dep habarlaıdy QazAqparat tilshisi.

SQO ákimi Qumar Aqsaqalov sý tasqynyna qarsy atqarylyp jatqan jumystarǵa jaýapty vedomstvolardyń esebin tyńdady.

Óńirde sý tasqyny kezinde zardap shegýi múmkin 85 eldi meken bar.

Sonyń, ásirese, 13-i mamandardyń baqylaýyna alynǵan. Jalpy bul aýyldarda 6 myńnan astam adam turady.

«Bir aptadan keıin kóktem bastalady. Kóktemdegi basty másele – sý tasqyny. Búgingi tańda aýyr tehnıka daıyn, janar-jaǵar maı, ınertti materıal jetkilikti. Sý tasqyny bolǵan jaǵdaıda shuǵyl áreket etýge 2,5 myń adam jáne 1,5 myń tehnıka daıyn. Aldyn ala atqarylǵan jumystardyń nátıjesinde, sońǵy bes jylda 170 eldi mekennen kóktemde sý basý qaýpi alyndy. Ol úshin 130 km-ge úımejal, 7 km astam jerge bóget jasaldy. Oblystyń avtojoldarynda 79 sý ótkizý qubyrlary jáne 7 tıýbıng qoıyldy. 48,5 km-de keptirý júıesi jóndelip, aýystyryldy», - dedi Qumar Aqsaqalov.

Byltyr aýyr tehnıka men qutqarýshylar sý basý qaýpi bar shalǵaı ornalasqan eldi mekenderge aldyn ala jiberildi.

Bıyl bul tájirıbe qaıtalanbaq.

«Kóktemgi sý tasqyny kezinde alqaptardan keletin sý bar. Byltyr osyndaı sý 13 ret joldy shaıyp ketti. Bıyl mundaı jaǵdaı qaıtalanbaýy úshin jergilikti ákimdikter jumystardy aldyn ala bastap, jaǵdaıdy nazarda ustap otyrýy qajet. Taǵy bir másele, aýyl ishindegi qarlardy shyǵarý. Sońǵy eki jylda 100-den astam eldi mekende aýylishilik joldar jóndelip, jańa asfalt tóseldi. Aýyl sharýashylyǵy qurylymdaryna osy joldardy saqtap qalý úshin aýyr tehnıkany shyǵarmaýdy tapsyramyn. Kóktemgi sý tasqynyna ázirlik Petropavlda da keń kólemde júrgizilýi tıis. Oblys ortalyǵyn aralaǵan kezde qalanyń shetkeri aýdandarynda qardyń shyǵarylmaı jatqanyn kóremin. Bul durys emes. Petropavl ákimine sý aǵarlar men káriz jelisiniń ýaqtyly tazartylýyn, shatyrlardan qardyń jáne muzdyń alynýyn baqylaýda ustaýyn tapsyramyn», - dedi oblys ákimi.