Soltústik Qazaqstanda 53 jastaǵy er adam óz úıinde órtenip ketti
PETROPAVL. QazAqparat – Soltústik Qazaqstan oblysynda órtengen úıden 53 jastaǵy er adamnyń máıiti tabyldy, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń málimetinshe, oqıǵa Aıyrtaý aýdanynyń Konstantınovka aýylynda bolǵan.
Eki páterden turatyn turǵyn úı otqa oranǵan. Úıdiń shatyryn, páterlerdiń tóbesin qyzyl jalyn sharpyp, búldirgen. Órttiń jalpy aýmaǵy – 75 sharshy metr.
Tilsiz jaý úıdiń ekinshi jartysyna jetpeı aýyzdyqtalyp, tolyq sóndirildi.
«Oqıǵa ornynan úı ıesiniń denesin taptyq. Órttiń sebebi – otty paıdalanǵanda abaı bolmaý. Temekiniń tuqyly tez tutanǵysh nársege túsip ketken» dep málim etti vedomstvodan.
Aıta keteıik, ótken aptada Soltústik Qazaqstan oblysynda 21 órt tirkelgen.
