Soltústik Qazaqstanda 40 kg balyqty zańsyz aýlaǵan turǵyn ustaldy

PETROPAVL. QazAqparat – Soltústik Qazaqstan oblysynda balyq aýlaýdyń tártibin buzý boıynsha 140 derek tirkeldi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, óńir turǵyny Esil aýdany Úlken Torańǵyl kólinde balyq aýlaǵan. Jaǵalaýǵa shyqqan odan tabıǵatty qorǵaýshylar aýdy, birneshe keli móńke men shortan balyǵyn aldy. Er adamda ózimen birge balyq aýlaýǵa ruqsat beretin qujattary bolmaǵan. Endi balyqshy 55 myń teńgege deıin aıyppul tóleýi múmkin.

«20 mamyrǵa deıin Esil ózeninde, onyń salalarynda, Sergeev sý qoımasynda balyq aýlaýǵa tyıym salynǵan. Bul – osy ýaqytta shortannyń ýyldyryq shashýyna baılanysty. Basqa sý qoımalarynda balyq aýlaýǵa bolady. Alaıda kóldi jalǵa alýshylardan ruqsat alý qajet», - deıdi SQO PD tabıǵatty qorǵaý tobynyń aǵa ınspektory Asqat Qojabaev.

Shal aqyn aýdanynyń 26 jastaǵy turǵyny da aıyppul tóleýi múmkin. Kishi Torańǵul kólinde balyq aýlaý talaptaryn oryndamaǵan er adamǵa ákimshilik materıal jınalyp jatyr. Odan aý, balyq aýlaıtyn kerek-jaraq, 40 keli balyq, qaıyq tárkilendi.

«Balyq aýlaý – kópshilik úshin demalys. Sol sebepti ekiniń biri zańnyń saqtalýyna mán bermeıdi. Balyq aýlaý tártibin buzǵandarǵa, balyq jáne basqa da sý jándikterine zııan keltirgenderge ákimshilik jaza barlyǵyn eske salamyz. Aıyppul tóleıdi, sondaı-aq sottyń sheshimimen balyq aýlaýǵa arnalǵan zattary tárkilenýi múmkin», - deıdi Asqat Qojabaev.

Jalpy oblysta jyl basynan balyq aýlaý tártibin buzýdyń 140 deregi tirkelgen.