Soltústik Qazaqstanda 3 jasar sábı jol apatynan qaza tapty
PETROPAVL. QazAqparat – Soltústik Qazaqstan oblysynda tasjoldan kólik ushyp ketip, saldarynan 3 jasar sábı mert boldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqys oqıǵa 22 tamyz kúni «Jezqazǵan-Petropavl» tasjolynyń 845-shaqyrymynda bolǵan. Esil aýdany Qaratal aýylynyń mańynda «Nissan Largo» kóliginiń 21 jastaǵy júrgizýshisi rólge ıe bola almaı qalyp, mashına jol shetindegi jyraǵa aýdarylǵan. Salonda áıeli men 3 jasar qyzy bolǵan.
Jolaýshylar aýdandyq ortalyq aýrýhanaǵa jetkizildi. Alaıda, sábı alǵan jaraqatynan qaıtys boldy.
Jol apaty Sotqa deıingi tergep-tekserýdiń biryńǵaı tizilimine «Kólik quralyn basqaratyn adamnyń jol júrisi nemese kólik quraldaryn paıdalaný qaǵıdalaryn buzýy» baby boıynsha engizildi. Avtokólik arnaıy turaqqa qoıyldy.
«Kólik apatyna ne sebep bolǵany anyqtalady. Barlyq júrgizýshilerdi jolaýshylardy, sonyń ishinde kishkentaı balalardy tasymaldaǵanda qaýipsizdik sharalaryn ustanýǵa shaqyramyz. Saqtyqty umytpaı, jolda júrý erejesin, jyldamdyq rejımin qatań saqtaý qajet», - deıdi SQO PD bastyǵynyń birinshi orynbasary Qanat Aıtbaev.
