Soltústik Qazaqstanda 2023 jyl – Maǵjan jyly dep jarııalandy
Bıyl Qyzyljar týmasy, aqıyq aqyn, Alash qaıratkeri Maǵjan Jumabaevtyń týǵanyna 130 jyl. Osyǵan oraı óńirde mereıtoıǵa oraı is-sharalar ótip jatyr.
SQO mádenıet, tilderdi damytý jáne arhıv isi basqarmasynyń qoldaýymen 1-10 aqpan aralyǵynda «Men ólmeımin, meniki de ólmeıdi...» atty respýblıkalyq jazba aqyndar músháırasy jarııalandy. Oǵan elimizdiń barlyq óńirinen 20-50 jas aralyǵynda 90 aqyn shyǵarmalaryn usyndy. Ereje boıynsha músháıraǵa Maǵjannyń aqyndyq, qaıratkerlik tulǵasyn pash etetin bir óleń, erkin taqyryptaǵy bir óleń usynyldy.
Kabyldanǵan shyǵarmalardy Qazaqstan Jazýshylar odaǵynyń tóraǵasy, aqyn Ulyqbek Esdáýlet, Qazaqstannyń eńbek sińirgen qaıratkeri Dáýletkereı Kápuly, belgili jýrnalıst-jazýshy Jarasbaı Súleımenov bastaǵan qazylar alqasy saraptap, jeńimpazdardy anyqtady.
15 aqpanda Petropavlda saltanatty marapattaý keshinde júzden júırik, myńnan tulpar atanǵan 9 aqynǵa Maǵjan Jumabaev atyndaǵy tuńǵysh ádebı syılyq tabystaldy. Syıaqy mólsheri – 300 myń teńge.
Marapattalǵandar: Tanagóz Tolqynqyzy, Baýyrjan Qaraǵyzuly, Abylaı Maýdanov, Mereı Qart, Nurgúl Oqasheva, Amanjol Zaǵypar, Araılym Muratalıeva, Qýanysh Ospan, Dáýlet Jadyrasyn.
«Men úshin qazaq elıtasynyń eń bir betine shyqqan qaımaǵy bul – alashtyqtar, sonyń bir jarqyn juldyzy Maǵjan Jumabaev. Ol - ózim jaqsy kóretin, ózim ǵashyq, ózim tóbege kóterip oqıtyn aqyndarymnyń biri. Jalpy men músháıralarǵa qatyspaımyn, biraq bul is-sharaǵa ózimniń ustanyma qarsy shyǵyp, kelip otyrmyn», - dedi Tanagóz Tolqynqyzy.
Sondaı-aq saltanatty keshte osy jyl óńirde Maǵjan jyly dep jarııalandy.
Foto: SQO mádenıet, tilderdi damytý jáne arhıv isi basqarmasy baspasóz qyzmeti
