Soltústik Qazaqstanda 200-ge jýyq dárigerdiń orny bos tur

PETROPAVL. QazAqparat – Soltústik Qazaqstan oblysynda medıtsınalyq kadr jetispeýshiligi máselesin sheshý úshin byltyr jergilikti bıýdjetten 22 jas mamanǵa kóterme járdemaqy, turǵyn úı satyp alýǵa 9 nesıe berildi, dep habarlaıdy QazAqparat tilshisi.

SQO-ǵa eki kúnge kelgen QR Densaýlyq saqtaý mınıstri Ajar Ǵınııat is-saparynyń qorytyndysy retinde óńirlik kommýnıkatsııalar qyzmetinde brıfıng ótkizdi.

Óńirde medıtsına salasynda sheshimin kútken másele barshylyq. Sonyń biri – kadr jetispeýshiligi.

Qazirgi ýaqytta 7,5 myń medqyzmetker bar bolsa, sonyń 1 694 dáriger jáne 5 839 orta medıtsına qyzmetkeri. Taǵy 187 dárigerdiń orny bos tur.

«Salany bilikti mamandarmen qamtamasyz etý úshin Mınıstrlik jyl saıyn óńirdiń qajettiligin eskere otyryp, medıtsına kadrlaryn daıarlaýǵa jáne olardyń biliktiligin arttyrýǵa memlekettik bilim berý tapsyrysyn bóledi. 2021 jyly oblys úshin rezıdentýranyń 17 medıtsınalyq mamandyǵy boıynsha 89 bilim granty bólindi. Mınıstrliktiń respýblıkalyq komıssııasy óńirge 56 túlekti, onyń ishinde 20-yn aýylǵa jiberip, jumysqa ornalastyrdy. Jergilikti jerlerde kadrlardy ustap qalý úshin jas mamandardy áleýmettik qoldaý qajet, 2021 jyly oblystyq bıýdjetten 22 jas mamanǵa kóterme járdemaqy, turǵyn úı satyp alýǵa 9 nesıe berildi», - dedi Ajar Ǵınııat.

Óńirde anestezıolog-reanımatologterge, jalpy tájirıbe dárigerlerine, akýsher-gınekologtar men kardıologtarǵa, ınfektsıonıster men terapevterge suranys joǵary.

«Jergilikti bıýdjet esebinen 1 myńnan astam medıtsınalyq maman, sonyń ishinde 226 dáriger biliktiligin joǵarylatty. M.Qozybaev atyndaǵy SQÝ-de 505 adam dáriger mamandyǵyn meńgerip jatyr. Sondaı-aq, túlekterdi derbes bólý jónindegi respýblıkalyq komıssııa SQO-da 56 mamandy onyń ishinde 20-syn aýyldyq jerlerge jumysqa ornalastyrdy», - dedi Densaýlyq saqtaý mınıstri.

Keshe Ajar Ǵınııat oblystyń birneshe aýdanynda bolyp, medıtsınalyq uıymdardy aralady, qyzmetkerlermen jáne turǵyndarmen kezdesti.