Soltústik Qazaqstanda 2 myńǵa jýyq kezekshi synyp jumys istemek

PETROPAVL. QazAqparat – Soltústik Qazaqstan oblysynda 20 myńǵa jýyq bala kezekshi synyptarda bilim alsa, jalpy mektepterdiń 70% shtattyq rejımde oqytpaq, dep habarlaıdy QazAqparat tilshisi.

Búgin SQO bilim basqarmasy basshysy Gúlmıra Kárimovanyń qatysýymen jańa oqý jyly qarsańynda brıfıng ótti. Onyń aıtýynsha, óńirde 71 myńnan astam oqýshy bar.

«1-4 synyp oqýshylary úshin ata-analardyń ótinishi boıynsha kezekshi synyptar ashyldy. 20 myńǵa deıin bala eki myńǵa jýyq kezekshi synypta bilim alady. Shalǵaıdaǵy shaǵyn jınaqty mektepterdiń oqýshylary shtattyq rejımde oqı alady degen sheshim qabyldandy. Mundaı mektepter sany 336 nemese 70%. Munda 19 myńnan astam bala oqıdy», - deıdi Gúlmıra Kárimova.

Daryndy balalarǵa arnalǵan mektepter jáne oblys ortalyǵyndaǵy korrektsııalyq mektepter bastaýysh synyp oqýshylaryna kezekshi synyptar uıymdastyrýmen qatar, qashyqtan da jumys isteıdi. Al aýyldyq túzetý mektepteri jabyq túrde shtattyq rejımde oqytady.

«Muǵalimderge kómektesý úshin birneshe kýrs uıymdastyryldy. 10 myń pedagogty qamtýǵa tıispiz. Qazirdiń ózinde 1500 ustaz oqýyn aıaqtady. Qalǵany jaqynda bitiredi. Alǵash ret qyrkúıek aıynyń basynda ata-analarǵa arnalǵan «Baqytty ata-ana - tabysty bala» onlaın-kýrsy uıymdastyryldy», - deıdi basqarma basshysy.