Soltústik Qazaqstanda 190 jasóspirim polıtsııa esebinde tur
PETROPAVL. QazAqparat – Soltústik Qazaqstan oblysynda tártibi nashar, túrli quqyqbuzýshylyq jasaǵan 190 jasóspirim polıtsııanyń esebinde tur, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Petropavl kósheleriniń birinde saǵat 1.00 shamasynda ıývenaldyq polıtseıler bir top jasty toqtatty.
Tekserý barysynda olardyń biriniń áli 18-ge tolmaǵany anyqtaldy. Jasóspirim túngi qydyrysy úshin ótken jazda da polıtseılerdiń nazaryna ilikken bolatyn.
Osy joly da onyń anasy shaqyrtyldy. Áıelge ákimshilik hattama toltyrylyp, profılaktıkalyq áńgime júrgizildi.
Mundaı túngi kezekshiliktiń basty mindeti – jasóspirimder tarapynan bolatyn, sondaı-aq olarǵa qatysty jasalatyn qylmystar men quqyq buzýshylyqtardyń aldyn alý.
SQO PD bastyǵynyń birinshi orynbasary Qanat Aıtbaevtyń aıtýynsha, jyl basynan ıývenaldyq polıtseıler oblys boıynsha 60-tan astam reıd ótkizgen.
Qańtar aıynda polıtsııaǵa 319 jasóspirim jetkizilipti. Túnde eresekterdiń qaraýynsyz júrgeni úshin balalardyń 210 zańdy ókili ákimshilik jaýapkershilikke tartyldy.
Oblysta túrli quqyq buzýshylyqtar jasaǵany úshin 8 jasóspirim esepke qoıyldy. Búginde polıtsııanyń esebinde 190 jasóspirim tur.
Onyń árqaısymen polıtseıler men ustazdar jekeleı jumys júrgizedi.
Kóshelerdegi reıdterden bólek polıtseıler esepke alynǵan otbasylardy da tekserip turady.
Balalaryna tıisti tárbıe bermeı, nemquraıly qaraǵany úshin bıyl oblysta 82 ata-ana jaýapqa tartyldy. Tártibi nashar 16 bala esepke qoıyldy.
