Soltústik Qazaqstanda 140-tan astam qonys aýdarýshy otbasylar turyp jatyr
PETROPAVL. QazAqparat - Oblystyq ákimdiktegi apparattyq jınalysta jumys kúshi mol aımaqtaǵy azamattardy Soltústik Qazaqstan oblysyna qonys aýdartý máselesi talqylandy, dep habarlaıdy «QazAqparat» HAA tilshisi oblys ákiminiń baspasóz qyzmetine silteme jasap.
Jumyspen qamtý jáne áleýmettik baǵdarlamalar basqarmasy basshysy Asqar Saqypkereevtiń aqparatyna súıensek, aǵymdaǵy jyldyń 1 qańtarynda azamattardy óńirge qonys aýdartý is-sharasyn júzege asyrý aıasynda 631 adamnan quralǵan 148 otbasy kóship kelgen. Onyń ishindegi 30 adamy bar 12 otbasy 2015 jyly qonys tepken.
«2017 jyly jappaı jumyspen qamtý jáne kásipkerlikke tartý baǵdarlamasy aıasynda bilimi joq jáne qandaı da bir biliktiligi joq jumyssyz qonys aýdarýshylarǵa bilim beriledi», - dep aıtty Asqar Saqypkereev.
Apparattyq jınalystyń qatysýshylary Úkimettiń keńeıtilgen otyrysynyń qorytyndysy boıynsha Memleket basshysynyń tapsyrmasyn qarady.
«Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyndaǵy 164 tapsyrmany oryndaý boıynsha sharalar qoldanyńyzdar. Jalpy ishki ónimdi 5%-ǵa turaqty túrde ósýin qamtamasyz etý kerek. Eńbek ónimdiligin 6%-ǵa arttyrý qajet», - dep atap ótti oblys ákimi.
Prezıdent júktegen tapsyrmalardy júzege asyrý maqsatynda óńir basshysy bıznes, memlekettik satyp alý, ónerkásip, agroónerkásiptik keshen, densaýlyq saqtaý, bilim berý, memlekettik qyzmet jáne EKSPO-2017-ge qatysý boıynsha jaýapty vedomstvolarǵa tıisti tapsyrmalar berdi.
