Soltústik Qazaqstanda 13 adamnan balyqtan juǵatyn ınfektsııa anyqtaldy
PETROPAVL. QazAqparat – Soltústik Qazaqstan oblysynda bıyl balyqtan juǵatyn parazıttik aýrý – opıstorhozdyń 13 jaǵdaıy tirkeldi, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, opıstorhoz – adamnyń uıqy bezin, ót joldaryn jáne baýyryn zaqymdaıtyn tabıǵı-oshaqtyq qurt aýrýy. Parazıttiń tasymaldaýshysy adam jáne úı janýarlary – ıt pen mysyq bolýy múmkin. Parazıt adam aǵzasynda ondaǵan jyldar boıy ómir súredi. Saldarynda opıstorhtar baýyr obyryn týdyrýy múmkin.
«Aýrý qozdyrǵyshy - úlkendigi 1 sm bolatyn opıstorh qurty nemese sibir sorǵyshy, onyń jumyrtqasy óte usaq bolady. Qurttyń jumyrtqasy men dernásili qorshaǵan ortaǵa tózimdi keledi: topyraq ústinde qurt jumyrtqalary 10 kúnge deıin, al sý aıdyndarynda 2 jylǵa deıin saqtalady. Dernásilderi 12 gradýsta 1 aıǵa deıin, balyqtaǵy tuzdyń mólsheri 10% bolǵanda 37 kúnge deıin, qaqtalǵan balyqta 20 kúnge deıin saqtalady. Balyqty ystyqtaı qaqtaý dernásildi joıady, al sýyqtaı qaqtaý olardyń ómir súrýine áser etpeıdi», - deıdi SQO sanıtarııalyq-epıdemıologııalyq baqylaý departamenti ınfektsııalyq jáne parazıttik aýrýlardy epıdemıologııalyq baqylaý bóliminiń bas mamany Saltanat Bekýmova.
Aıtýynsha, adamǵa ınfektsııa shıki, jetkilikti qýyrylmaǵan jáne azdap tuzdalǵan, keptirilgen balyqty jegende juǵady.
«Onda opıstorhıs gelmıntteriniń dernásilderi bolady. Opıstorhıs dernásilderi negizinen tuqy tekti – ıaz, elets, shabaq, eýropalyq plotva, vobla, lın, krasnoperka, sazan jáne taban, tuqy, móńke balyqtarynda kezdesedi. Bir balyqta 7 myńǵa deıin dernásil bolýy múmkin. Zaqymdalǵan balyqty aıyra almaısyz, óıtkeni dernásilder tek mıkroskoppen ǵana kórinedi», - deıdi maman.
Opıstorhozdy juqtyrmaý úshin balyqty jetkilikti deńgeıde pisirip jegen durys.
«Balyqty qaınaǵan sátten bastap kem degende 15-20 mınýt pisirý kerek, balyq bálishin peshte keminde 40 mınýt ustaǵan jón. Az tuzdalǵan jáne juqa etip tilinip, tońazytylǵan balyq etin paıdalanýdan bas tartyńyz. Shıki balyqty nemese onyń ishin úı janýarlaryna berýge bolmaıdy, óıtkeni olardyń juqtyrý qaýpi artady, bul jaǵdaıda janýarlar opıstorhozdy adamǵa taratýy múmkin», - deıdi Saltanat Bekýmova.
