Soltústik Qazaqstanda 1 myńǵa jýyq adam koronavırýsqa qarsy vaktsına aldy
PETROPAVL. QazAqparat – Soltústik Qazaqstan oblysynda 1 aqpannan beri 990 adam koronavırýsqa qarsy vaktsına aldy, ekpe egilgenderdiń jaǵdaıy jaqsy, dep habarlaıdy QazAqparat tilshisi.
Jalpy tájirıbe dárigeri Denıs Brestiń koronavırýsqa qarsy ekpe alǵanyna búgin altynshy kún.
Petropavldaǵy № 1 emhananyń mobıldi top quramynda jumys isteıtin medıtsınalyq qyzmetkerge ekpe alǵashqy lekpen salyndy.
Sózine qaraǵanda, qazir jaǵdaıy jaqsy, kúndelikti jumysyn atqaryp júr.
«3 aqpan kúni vaktsına aldym. Sol kúni keshke dene qyzýym 37 gradýsqa deıin kóterildi. Kádimgi paratsetamoldy ishkennen keıin temperatýra tústi. Tańerteń turǵanda ystyǵym bolǵan joq, biraq ózimdi álsiz sezindim. Inektsııa salǵan jer aýyryńqyrady. Al túske qaraı munyń bári basylyp, aǵzamda basqa ózgeris bolǵan joq», - deıdi dáriger.
Denıs Bres ótken jyldyń sáýir aıynan koronavırýs juqtyrǵan syrqattarmen jumys istep keledi.
Bastapqyda emhanada fıltrde otyryp, naýqastardy qabyldady. Al maýsym aıynan beri mobıldi top quramynda.
«Tańerteń shaqyrtýlarmen ketemiz, túski asymyzdy ishkennen keıin qaıta jumysymyzdy jalǵastyramyz. Koronavırýstyń jeńil túrin juqtyryp, úıinde em alyp jatqandar da bizdiń baqylaýymyzda.
Saqtanǵandyqtan shyǵar, ári sáttilik joldas boldy ma - buǵan deıin qaýipti vırýsty juqtyrǵan joqpyn. Biraq bel ortasynda júrgendikten erte me, kesh pe aýyrýym múmkin. Sol sebepti vaktsına qoıdyrýǵa sheshim qabyldadym. KVI-di juqtyrǵan jaǵdaıda da ekpeden keıin ol jeńil ótedi, ımmýnıtet qalyptasady», - deıdi medıtsına qyzmetkeri.
Jalpy SQO-ǵa 1 aqpan kúni KVI-ge qarsy 1200 doza vaktsına jetkizilgen edi.
SQO densaýlyq saqtaý basqarmasy baspasóz qyzmetiniń málimetinshe, búginge deıin 990 adam vaktsına alyp úlgerdi.
Olar negizinen koronavırýspen kúreste aldyńǵy shepte júrgen medıtsına qyzmetkerleri.
