Soltústik Qazaqstan jastar kásipkerligin damytýǵa 200 mln teńge bóledi
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov jastarmen beıresmı kezdesip, olardyń ıdeıalary men usynystaryn tyńdady, dep habarlaıdy QazAqparat tilshisi.
SQO ákimi baspasóz qyzmetiniń habarlaýynsha, óńir basshysymen kezdesýge oblystyń qoǵamdyq ómirine belsendi atsalysyp júrgen jastar keldi. Eń isker, belgili bir jetistikke jetip úlgergen, shyǵarmashyl, kreatıvti jáne sportta úzdik jastar oı-pikirlerimen, bolashaqqa josparlarymen jáne usynystarymen bólisti. Qumar Aqsaqalov jastardy kásipkerlikpen aınalysýǵa shaqyryp, memleket tarapynan jasalatyn qoldaýlar týraly aıtty.
«Damý» qorymen birige otyra, jastar kásipkerligin odan ári damytý kerek. Biz kelesi jyly bul baǵytqa 200 mln teńge bólýge daıynbyz. Jastardy «qarapaıym zattar» ekonomıkasy salasy boıynsha bıznes bastaýǵa shaqyramyn. Al, olardy oqytýǵa tájirıbeli kásipkerlerdi tartý kerek. Oqý oryndarynda bıznesmender ózderiniń tájirıbelerimen bólisedi. Oqýshylar saraıy qabyrǵasynda pıtchıngter uıymdastyryp, ol jerde jastar ózderiniń bıznes-ıdeıalarymen bólisedi. Kásipkerler olardyń jobasyn birlese júzege asyratyn bolady», - dedi Qumar Aqsaqalov.
Óńir basshysy volonterlar qozǵalysynyń mańyzdylyǵy týraly aıta kele, jumys berýshilerdi jastardy qyzmetke alǵan kezde volonterlik tájirıbelerin eskerýdi surady.
Ýnıversıtet qabyrǵasynda stýdentterdiń jobamen aınalysýy týraly da atap ótildi.
«Elbasy Nursultan Nazarbaevtyń tapsyrmasymen kelesi jyly óńirde oqytý-zerthanalyq korpýs salynady. Ol zamanaýı qondyrǵylarmen jaraqtandyrylmaq. Álemdegi barlyq úzdik tehnologııalar bizde de bolady. Jastar ózderiniń ǵylymı potentsıaldaryn barynsha qoldanýlary qajet. Ýnıversıtette stýdent bir jobany qolǵa alyp, ony kásipkerlermen birge júzege asyratyndaı tájirıbeni engizý kerek. Dıplommen birge jobasyn da qorǵap shyǵady. Sóıtip, biz jastardy ǵylym jáne kásipkerlikpen aınalysýǵa yntalandyramyz»,- dedi Qumar Aqsaqalov.
