Soltústik Qazaqstan turǵyndarynyń shyǵystary ulǵaıa túsýde
ASTANA. QazAqparat - Soltústik Qazaqstan oblystyq statıstıka departamenti 2016 jylǵy óńir turǵyndarynyń shyǵystaryn eseptedi, dep habarlaıdy QazAqparat.
Departamenttiń málimetinshe, úı sharýashylyqtaryn zertteý derekterine sáıkes halyqtyń aqshalaı shyǵystary ortasha jan basyna shaqqanda 2016 jyly 496159 teńgeni qurady. Bul 2015 jylǵa qaraǵanda 14,7 paıyzǵa joǵary. Taýarlar jáne qyzmetter satyp alýdyń úles salmaǵy barlyq shyǵystardyń 87,8, týystary men tanystaryna materıaldyq kómek jáne alımentter 6,5, salyqtar, tólemder jáne basqa tólemder 0,2, kredıtter men boryshtardy óteý 5,5 paıyzdy qurady.
Tutynýshylar bıýdjetinde azyq-túlik taýarlaryna jumsalǵan shyǵystar 44,8, azyq-túlik emes taýarlar 32,9, aqyly qyzmetter 22,3 paıyzdy qurady.
Halyqtyń jan basyna shaqqandaǵy azyq-túlik taýarlaryna jumsalǵan shyǵystar somasy 2016 jyly 195227 teńgeni qurap, ótken jylmen salystyrǵanda 21,6 paıyzǵa ulǵaıdy. Azyq-túlik taýarlaryna jumsalǵan shyǵystardyń 88,2 protsenti tamaq ónimderi men alkogolsiz sýsyndarǵa, 4,5 protsenti úıden tys tamaqtanýǵa, 2,7 protsenti alkogoldi ishimdikterge, 4,5 protsenti temeki buıymdaryna jumsalǵan. Tamaq ónimderine jumsalǵan shyǵystardyń 25,9 protsentin et jáne et ónimderi, 18,7 protsentin nan ónimderi men jarma ónimderi, 10,1 protsentin qant, kondıterlik ónimder men táttiler, 9,2 protsentin sút ónimderi alady.
2016 jyl ishinde ortasha eseppen bir oblys turǵyny azyq-túlik emes taýarlardy satyp alýǵa 143087 teńge jumsady. Azyq-túlik emes taýarlar shyǵystarynyń 32,8 protsentine kıim-keshek, mata jáne aıaq kıim alynsa, 13,2 protsentine jıhaz, úı turmysynyń zattary men turmystyq tehnıka, 16,3 protsentine suıytylǵan gaz jáne otynnyń ózge de túrlerin, 17,1 protsentine avtokólik quraldary men jeke kólik quraldary úshin janar-jaǵarmaı materıaldaryn, 7,3 protsentine medıkamentter jáne saýyqtyrý jabdyqtary men apparatýra, 6,4 protsentine jeke bas tazalyǵyna arnalǵan taýarlar satyp alyndy.
