Soltústik Qazaqstan turǵyndary 700 kólikti ýtılızatsııaǵa tapsyrǵan
PETROPAVL. QazAqparat - Kún saıyn Soltústik Qazaqstan oblysynyń turǵyndary ýtılızatsııaǵa 6 kólikten tapsyrady, dep habarlaıdy QazAqparat.
«Operator ROP» JShS ókili Oraztaı Ábdirahmanovtyń aıtýynsha, byltyr eski kólikterdi satyp alý bastalǵan kezde, qaıta óńdeýge kúnine 15-20 kólik tapsyrylǵan. Qazir bul qarqyn báseńsı tústi.
Negizinen azamattar «Moskvıch», «Jıgýlı», «Zaporojets», GAZ-69 kólikterin tapsyrady eken. «Volga» men túrli sheteldik kólikter de kezigedi. Qaıta óńdeýge tapsyrylǵan kólikterdiń deni 20-30 jyl buryn shyǵarylǵan.
«Kólikterden akkýmýlıatorlardy sheship, motor maılaryn quıyp alamyz. Arnaıy qondyrǵy jetkizilgen kezde, biz ol kólikterdi brıketke aınaldyryp, óńdeý zaýyttaryna yńǵaıly kúıde jóneltetin bolamyz», - dedi Ábdirahmanov.
Qazirgi ýaqytta 700 kólik tapsyrylǵan. Árbir kólikke 150 myń teńge aqy tólenedi. Ábdirahmanovtyń sózinshe, sonymen qatar 300 myń teńge somasynda sertıfıkattar berý baǵdarlamasy jasalady. Eger kólik ıeleri qolma-qol aqsha alǵandy jón sanasa, qolyna 150 myń teńge beriledi. Eger sertıfıkatty tańdaıtyn bolsa, jańa kólikti salonnan satyp alý kezinde 300 myń teńgege jeńildik jasalady. Maýsym aıynan bastap, júk kólikterin qabyldaý josparlanýda.
Jalpy 2016 jyly el boıynsha, 5 665 kólik qaıta óńdeýge tapsyrylǵan.
