Soltústik Qazaqstan stýdentteri túski asqa soldat botqasyn jedi
PETROPAVL. QazAqparat - QR Ulttyq gvardııasynyń 6637-inshi áskerı bólimshesinde Soltústik Qazaqstan oblysynyń áskerı-patrıottyq jáne áskerı-sport klýbtarynyń «Otan qorǵaýshy-2017» sleti ótti, dep habarlaıdy «QazAqparat» HAA tilshisi óńirlik kommýnıkatsııalar qyzmetine silteme jasap.
Shara 2009 jyldan beri ótkizilip keledi. Uıymdastyrýshylardyń aıtýynsha, slettiń basty maqsaty - jastardyń belsendi azamattyq ustanymyn qalyptastyryp, otansúıgishtik rýhta tárbıeleý, sportqa jumyldyrý jáne áskerde boryshyn óteýge shaqyrý. Bıyl jarysqa oblystyń túrli aýdandarynan 13 komanda qatysty. Olardyń árqaısysynda alty qatysýshydan boldy. Olardyń arasynda joǵary synyp oqýshylary, kolledj qatysýshylary, sondaı-aq SQO-daǵy áskerı-patrıottyq jáne áskerı-sport klýbtarynyń músheleri bar.
«Jarys úsh kezeńmen ótti. Birinshi týr - áskerılendirilgen estafeta. Jigitter ózderin Kalashnıkov avtomatyn buzý jáne jınaý, gazǵa qarsy qurylǵymen júgirý, jup bolyp baılanǵan aıaqtarmen júgirý. Odan keıin beltemirde jarysyp, fınalda komanda bolyp arqan tartysty», - dedi áskerı bólimshe komandıriniń tárbıe jáne áleýmettik-quqyqtyq jumystar jónindegi orynbasary maıor Kenjebolat Baltabaev.
Petropavl temirjol kóligi kolledjiniń «Alǵys» komandasynyń atynan shyqqan Oleg Baksheev patrıottyq klýbtar sletine ekinshi ret qatysyp otyr.
«Beltemirde tartynýdy unatamyn, óıtkeni nátıjelerim jaqsy. Byltyr bizdiń komanda 3-oryn alǵan. Kolledjdi bitirip, áskerı ınstıtýtqa túsemin», - deıdi Oleg Baksheev.
Jeńimpazdarǵa dıplomdar, kýboktar, medaldar jáne baǵaly syılyqtar tapsyryldy. Slet qatysýshylaryna túski asqa soldat botqasy berilip, áskerı tehnıkalar kórsetildi.
