Soltústik Qazaqstan oblysynyń ákimi qylmystyq-atqarý júıesiniń qyzmetkerlerine áleýmettik kómek kórsetýdi tapsyrdy
ASTANA. Qyrkúıektiń 29-y. QazAqparat /Ǵalymjan Hasenov/ - Soltústik Qazaqstan oblysynyń ákimi Serik Bilálov sybaılas jemqorlyqpen kúres jónindegi vedomstvoaralyq komıssııanyń májilisinde qylmystyq-atqarý júıesiniń qyzmetkerlerine áleýmettik kómek kórsetý týraly tapsyrma berdi.
Bul týraly Qylmystyq-atqarý júıesi komıtetiniń aımaqtyq departamentinen habarlady.
Májiliske qatysqan departament bastyǵynyń orynbasary Bıbigúl Mansurovanyń habarlaýynsha, negizgi máselelerdiń qatarynda aımaqtyń qylmystyq-atqarý júıesiniń qyzmetkerlerine áleýmettik kómek kórsetý jónindegi problema kóterildi. Atap aıtqanda, júıe qyzmetkerlerin olar qatty muqtaj bolyp otyrǵan baspanamen qamtamasyz etý, sondaı-aq alys ornalasqan túzeý mekemesiniń kadrlyq quramyn nyǵaıtý máselelerin sheshý týraly sóz boldy.
Osyǵan oraı S.Bilálov túzeý mekemeleriniń qyzmetkerlerine oblys ortalyǵynan 6 vedomstvolyq páter bólý týraly máseleni sheshýdi jáne jer-jerlerde kadrlardy nyǵaıtý maqsatynda Esil aýdanynyń Gornyı kentinde turatyn qylmystyq-atqarý júıesi qyzmetkerleriniń otbasylaryna arnap jaıly jataqhana salý týraly máseleni qarastyrýdy tapsyrdy.
Áleýmettik problemalardyń sheshilýi salanyń aldyna qoıylǵan mindetterdiń oryndalýyna jáne júıeniń bedelin nyǵaıtýǵa sózsiz oń áserin tıgizedi, deıdi Qylmystyq-atqarý júıesi komıtetiniń aımaqtyq departamenti basshysynyń orynbasary Bıbigúl Mansurova.
