Soltústik Qazaqstan oblysynyń ákimi evakýatsııalanǵan aýyl turǵyndarymen kezdesti
PETROPAVL. QazAqparat - Oblys ákimi Qumar Aqsaqalov Esil aýdanyna baryp, evakýatsııalanǵan Nıkolaevka aýylynyń turǵyndarymen kezdesti, dep habarlaıdy «QazAqparat» HAA óńir basshysynyń baspasóz qyzmetine silteme jasap.
Esil aýdanyndaǵy sý tasqynynyń jaǵdaıy týraly Qumar Aqsaqalovqa aýdan ákimi Muratbek Ábishev baıandady. Onyń deregi boıynsha, Jarqaıyń aýylynda 30 turǵyn úıge sý tasqynynyń qaýpi tónip tur.
Nıkolaevka aýylynda 40 aýladan 114 adam evakýatsııalandy.
«Úlken Tarangúl ózenindegi sý deńgeıi tómendep jatyr, sýdy azaıtý burynǵy kólemde jalǵasýda. Taıaý kúnderi jaǵdaı birqalypqa keledi dep oılaımyn», - dep málimdedi oblys ákimine oblystyq tótenshe jaǵdaılar departamentiniń basshysy Pavel Fılıppov.
Oblys ákimi Esil aýdanynyń basshylyǵyna aldaǵy kúnderi bolatyn qolaısyz aýa raıy týraly eskertip, apatty jaǵdaıdan az shyǵynmen shyǵýdyń múmkinshiligin qarastyrýdy tapsyrdy.
«Eń bastysy: halyqtyń qaýipsizdigin qamtamasyz etip, evakýatsııalanǵan adamdardyń múlkin saqtap qalý», - dedi Qumar Aqsaqalov.
Sý basý qaýpi bar aımaqqa - Esil ózeniniń mańynda ornalasqan 11 aýyl kiredi.
